TNFL. "Köpetdagyň" çempionlyk ýoly

10.11.2024ý.

Ozal hem habar berşimiz ýaly, Aşgabadyň «Köpetdag» topary futzal boýunça Türkmenistanyň çempionatynyň Naýbaşy ligasynyň şu gün tamamlanan möwsüminde çempion bolmagy başardy.

Şu makalamyzda çempionyň çempionlyk ýoluna gysgaça nazar aýlamagy maksat edindik.

Çempion üçin möwsümiň garaşylyşy ýaly başlandygyny aýdyp bolmaz. Çünki topar ilkinji iki duşuşygynda 4 utuk ýitirdi. Ýaryşy bäşinji orunda tamamlan TNGIZT möwsümdäki ilkinji duşuşygynda «Köpetdag» bilen 3:3 hasabynda deňme-deň oýnamagy başardy. Türkmenbaşy şäherine wekilçilik edýän ikinji bir topar ― «Deňizçi» bolsa 2-nji tapgyrda «Köpetdagy» 4:1 hasabynda ýeňdi.

Çempion şondan soňky iki tapgyrda «Turany» 5:1, «Migrasiýany» bolsa 3:1 hasabynda ýeňip, janköýerlerine azda-kände umyt beren hem bolsa, 5-nji tapgyrda esasy bäsdeşi bolan «Senagatbankdan» 1:3 hasabynda ýeňlip, olaryň keýpine ýene sogan dogrady. Topar şondan soň TNGIZT-i hem kynlyk bilen (4:3) ýeňdi. 7-nji tapgyrdaky 8 golly duşuşykda bolsa «Deňizçiden» ikinji gezek ýeňlip (3:5) çempionlyk tamasyny has inçeltdi. Şondan soň «Köpetda» tä 17-nji tapgyrda ýene-de «Deňizçi» bilen duşuşýança, ähli garşydaşlaryny ýeňdi. Gollara baý duşuşyklarda «Köpetdagdan» «Turan» 4:9, «Migrasiýa» 2:4, «Senagatbank» 2:6 hasaplarynda ýeňildi. Gyzykly tarapy «Senagatbank» her 10 tapgyrdan bir gezek ― 10-njy we 20-nji tapgyrlarda «Köpetdagdan» şol bir hasap ― 2:6 hasabynda ýeňildi. 17-nji tapgyra çenli ýeňişli ýoluny dowam edip, ýaryş tertibinde birinji orna çenli göterilen «Köpetdag» 11-nji tapgyrda TNGIZT-i 5:4, 12-nji tapgyrda «Deňizçini» möwsümde ilkinji gezek 5:2, 13-nji tapgyrda «Turany» 3:0 (Tehniki ýeňiş), 14-nji tapgyrda «Migrasiýany» 5:4, 15-nji tapgyrda «Senagatbanky» 3:2 (şol duşuşykdan siň möwsümde ilkinji gezek ýaryş tertibiniň birinji ornuna geçdi), 16-njy tapgyrda TNGIZT-i 9:2 hasabynda ýeňdi. Aşgabatda geçirilen 17-nji tapgyryň duşuşygynda bolsa möwsümde üçünji gezek «Deňizçiden» asgyn geldi. Bu bolsa möwsümiň tamamlanmagyna üç tapgyr galanda «Köpetdagyň» çempionlyk umydyny inçelden ýagdaý boldy. Ýöne «Köpetdagy» ýykan hem, goldan hem ýene «Deňizçi» boldy. Türkmenbaşy şäherine wekilçilik edýän topar 18-nji tapgyrda «Senagatbank» bilen deňme-deň oýnap (2:2), şol tapgyrda tehniki ýeňiş alan «Köpetdagyň» ýene öňe geçmegine ýol açdy. Şondan soň «Köpetdag» 19-njy tapgyrda «Migrasiýany» 3:2 hasabynda ýeňip, iň ýakyn bäsdeşi bilen 1 utuklyk tapawudy gorady. Final derejesindäki jemleýji duşuşykda bolsa «Senagatbank» çempion üçin diňe ýeňşiň gerekdigine gowy düşünýärdi. Şu maksat bilen meýdança çykan topar eýýäm 3-nji minutda Nurmyrat Gurbangeldiýewiň geçiren goly bilen öňe-de saýlandy. Ýöne «Köpetdag» bu gola edil şol minudyň özünde Kerwen Annaorazowyň tapawutlanmagynda jogap berip bildi. «Senagatbankyň» 10-njy minutda ikinji gezek öňe saýlanandygyny garamazdan, topar bu artykmaçlygyny hem bary-ýogy 2 minut gorap bildi. «Köpetdag» bolsa diňe bir 12-nji minutda hasaby deňlemek bilen çäklenmän, eýsem, 5 minut soňra şu duşuşykda ilkinji gezek hasapda öňe-de çykdy. Şondan soň bolsa «Senagatbank» güýçli garşydaşynyň bary-ýogy 3 minutda geçiren 3 goluna hiç hili çäre tapyp bilmedi.

Şeýlelikde, «Köpetdag» nobatdaky gezek futzal boýunça ýurdumyzyň çempiony boldy. Bu çempionlyk topara indiki möwsümlerde yklym derejeli ýaryşlara gatnaşmak hukugyny berer.

Agageldi ITALMAZOW

«Janköýer»

Bizi yzarlaň, biziň bilen galyň!