DÇ - 2026. Norwegiýa Kot-d’Iwuary ýeňip, Braziliýanyň garşydaşy boldy

Futbol boýunça 2026-njy ýylyň dünýä çempionatynyň 1/16 finalynyň nobatdaky duşuşygy tamamlandy. Onda Norwegiýanyň milli ýygyndysy Kot-d’Iwuaryň milli ýygyndysyny 2:1 hasabynda ýeňip, 1/8 finala çykdy.

ABŞ-nyň Arlington şäherindäki "AT&T" stadionynda geçirilen duşuşyga wenesuelaly emin Hesus Walensuela ýolbaşçylyk etdi.

Duşuşygyň 39-njy minutynda Antonio Nusa uzak aralykdan geçiren owadan goly bilen Norwegiýany öňe çykardy. Ikinji ýarymda Kot-d’Iwuar hasaby deňlemegi başardy. 74-nji minutda Amad Diallo birnäçe goragçydan geçip, takyk urgusy bilen hasaby 1:1-e getirdi.

Duşuşyk goşmaça wagta gider öýdülýän mahaly, Norwegiýanyň ýyldyzy Erling Holand 86-njy minutda topy derwezä girizip, toparyna 2:1 hasabyndaky ýeňşi getirdi.

Bu ýeňişden soň Norwegiýa dünýä çempionatynyň taryhynda ilkinji gezek pleý-off tapgyrynda ýeňiş gazanyp, 1/8 finala çykdy. Olar indiki tapgyrda Braziliýanyň milli ýygyndysy bilen duşuşar. Bu duşuşyk 6-njy iýulda geçiriler.

Erling Holand üçin hem bu oýun aýratyn ähmiýetli boldy. Hüjümçi milli ýygyndydaky 60-njy goluny geçirdi we bu görkeziji boýunça Fransiýanyň ýyldyzy Kilian Mbappe bilen deňleşdi. Şeýle-de Holand XXI asyrda dünýä çempionatynyň ilkinji üç duşuşygynda bäş ýa-da ondan köp gol geçiren üçünji futbolçy boldy. Ondan öň muny diňe Miroslaw Kloze bilen Garri Keýn başarypdy.Kot-d’Iwuar bolsa dünýä çempionatyndaky çykyşyny tamamlady. Norwegiýa bolsa Braziliýa garşy geçiriljek 1/8 final duşuşygynda çärýek finala çykmak ugrunda göreşer.