DÇ - 2026. "K" we "L" toparçalarda ikinji tapgyr tamamlandy

Futbol boýunça 2026-njy ýyldaky dünýä çempionatynda 23-nji iýunda we 24-nji iýuna geçilýän gije geçirilen duşuşyklar bilen "K" we "L" toparçalarda ikinji tapgyr tamamlandy.

Günüň ilkinji duşuşygy "K" toparçada Portugaliýanyň milli ýygyndysy bilen Özbegistanyň milli ýygyndysynyň arasynda geçirildi. ABŞ-nyň Hýuston şäherindäki "En-Er-Ji" stadionynda geçirilen duşuşyga marokkoly emin Jalal Jaýed ýolbaşçylyk etdi. Portugaliýanyň milli ýygyndysy 5:0 hasabynda uly ýeňiş gazandy.

Hasap 6-njy minutda Kriştianu Ronaldunyň goly bilen açyldy. 17-nji minutda Nunu Mendeş hasaby 2:0-a çykardy. 29-njy minutda Özbegistanyň goragçysy Azizjon Ganiýewiň goly "VAR" ulgamynyň kömegi bilen, Abbosbek Faýzullaýewiň Žoau Kanselua garşy düzgün bozmagy sebäpli hasaba alynmady. 39-njy minutda Kriştianu Ronaldu özüniň ikinji goluny geçirip, hasaby 3:0 etdi. 60-njy minutda öz derwezesine gol geçiren Abduwohid Nematow portugallaryň dördünji goluna sebäp boldy. 87-nji minutda Rafael Leau duşuşygyň soňky goluny geçirip, hasaby 5:0 etdi.

Bu duşuşykda iki gezek tapawutlanan Kriştianu Ronaldu dünýä çempionatlarynda geçiren gollarynyň sanyny 10-a ýetirip, Eusebionyň rekordyny yzda galdyrdy we Portugaliýanyň dünýä çempionatlaryndaky iň gowy bombardiri boldy. Şeýle hem ol alty dürli dünýä çempionatynda gol geçiren ilkinji futbolçy hökmünde taryha girdi.

"L" toparçadaky ilkinji duşuşykda Angliýanyň milli ýygyndysy bilen Gananyň milli ýygyndysy ABŞ-nyň Foksboro şäherindäki "Jillet" stadionynda güýç synanyşdy. Gondurasly emin Saýid Martinesiň ýolbaşçylyk eden duşuşygynda toparlar 0:0 hasabynda deňme-deň oýnadylar.

Şondan soň "L" toparçasynyň beýleki duşuşygy geçirildi. Kanadanyň Toronto şäherindäki "Bi-Em-O Fild" stadionynda Panamanyň milli ýygyndysy bilen Horwatiýanyň milli ýygyndysy duşuşdy. Gabonly emin Pýer Açonyň ýolbaşçylyk eden oýnunda horwatlar 1:0 hasabynda ýeňiş gazandy. Duşuşykdaky ýeke-täk goly 54-nji minutda Ante Budimir geçirdi.

Bu ýeňlişden soň Panamanyň milli ýygyndysy dünýä çempionatynyň pleý-off tapgyryna çykmak mümkinçiligini doly ýitirdi. Şeýlelikde, Panama ýaryş bilen ir hoşlaşan Gaiti, Türkiýe, Tunis we Iordaniýa milli ýygyndylarynyň hataryna goşuldy.

Günüň soňky duşuşygy "K" toparçada Kongo Demokratik Respublikasynyň milli ýygyndysy bilen Kolumbiýanyň milli ýygyndysynyň arasynda geçirildi. Meksikanyň Sapopan şäherindäki "Akron" stadionynda geçirilen duşuşygy italiýaly emin Maurisio Mariani dolandyrdy. Kolumbiýanyň milli ýygyndysy 1:0 hasabynda ýeňiş gazandy. Duşuşykdaky ýeke-täk goly 76-njy minutda goragçy Daniel Munýos geçirdi.

Ikinji tapgyrdan soň "K" toparçada Kolumbiýanyň milli ýygyndysy alty utuk bilen birinji orny eýeleýär. Portugaliýanyň milli ýygyndysy dört utuk bilen ikinji basgançakda ýerleşýär. Kongo Demokratik Respublikasynyň milli ýygyndysynyň bir utugy bar, Özbegistanyň milli ýygyndysy bolsa heniz utuk gazanyp bilmän, soňky orunda galýar.

"L" toparçada bolsa Angliýanyň we Gananyň milli ýygyndylarynyň hersiniň dört utugy bar. Horwatiýanyň milli ýygyndysy ilkinji ýeňşinden soň üç utuga eýe boldy. Panama bolsa utuk gazanyp bilmän, toparçada soňky ýerde ýerleşýär.

Häzirki wagtda dünýä çempionatynyň bombardirleriniň sanawynda bäş gol bilen Argentinanyň milli ýygyndysynyň hüjümçisi Lionel Messi öňdeligi saklaýar. Onuň yzyndan Norwegiýanyň milli ýygyndysyndan Erling Holand we Fransiýanyň milli ýygyndysyndan Kilian Mbappe dört goldan geçirip, ikinji orny paýlaşýarlar.