Portugaliýa Özbegistany jogapsyz bäş gol bilen ýeňdi, Ronaldu täze taryhy üstünliklere ýetdi

Futbol boýunça 2026-njy ýyldaky dünýä çempionatynyň "K" toparçasynda ikinji tapgyryň çäginde Portugaliýanyň milli ýygyndysy bilen Özbegistanyň milli ýygyndysy duşuşdy. ABŞ-nyň Hýuston şäherindäki "En-Er-Ji Stediumynda" geçirilen duşuşyga marokkoly emin Jalal Jaýed ýolbaşçylyk etdi. Oýun portugallaryň 5:0 hasabyndaky ynamly ýeňşi bilen tamamlandy.

Duşuşyk örän çalt başlandy. Portugaliýanyň ýyldyzy Kriştianu Ronaldu eýýäm 6-njy minutda hasaby açdy. Şeýlelikde, 41 ýaşly hüjümçi karýerasynda altynjy dünýä çempionatynda hem gol geçirip, futbol taryhynda mundan öň hiç kime başartmadyk üstünligi gazandy. Ronaldu mundan öň 2006, 2010, 2014, 2018 we 2022-nji ýyllardaky dünýä çempionatlarynda hem tapawutlanypdy. Şol sebäpli ol dünýä çempionatlarynyň altysynda-da gol geçiren ilkinji futbolçy boldy.

17-nji minutda Nunu Mendeş portugallaryň artykmaçlygyny iki gola çykardy. Özbegistanyň goragçysy Azizjon Ganiýew 29-njy minutda tapawutlansa-da, "VAR" ulgamynyň kömegi bilen gol hasaba alynmady. Sebäbi Abbosbek Faýzullaýewiň Žoau Kanselu garşy eden düzgün bozmasy anyklandy.

39-njy minutda Kriştianu Ronaldu ýene tapawutlanyp, duşuşykdaky ikinji goluny geçirdi. Şeýlelikde, ol dünýä çempionatlaryndaky gollarynyň sanyny 10-a ýetirdi. Mundan öň Portugaliýanyň milli ýygyndysy üçin dünýä çempionatlarynda iň köp gol geçiren oýunçy Eýsebio bolup, onuň hasabynda 9 gol bardy. Ronaldu ilki onuň rekordyny deňledi, soň bolsa täze rekord goýdy.

Bu duşuşykdaky dubl bilen Ronaldu 40 ýaşdan uly wagty dünýä çempionatynda dubl eden ilkinji futbolçy boldy. Şeýle hem ol dünýä çempionatlarynda gol geçiren iň ýaşuly ikinji futbolçy hökmünde taryha girdi. Bu ugurda öňdeligi henizem 42 ýaşynda Russiýanyň milli ýygyndysynyň derwezesine gol geçiren kamerunly Rože Milla eýeleýär.

Portugaliýanyň üçünji golundan soň hem hüjüm dowam etdi. 60-njy minutda Özbegistanyň derwezebany Abduwohid Nematow öz derwezesine gol geçirip, hasaby 4:0-a ýetirdi. Duşuşygyň soňlarynda, 87-nji minutda Rafael Leau tapawutlanyp, oýnuň soňky nokadyny goýdy.

Ronaldu duşuşygyň iň gowy oýunçysy diýlip ykrar edildi. Ol iki gol geçirip, toparynyň iň uly gahrymany boldy. Şeýle hem onuň umumy karýeradaky gollarynyň sany 975-e ýetdi. Häzirki wagtda onuň hasabynda Portugaliýanyň milli ýygyndysy üçin 145 gol we klublar karýerasynda 830 gol bar.

Duşuşykdan soň Portugaliýanyň milli ýygyndysy dört utuk bilen "K" toparçasynyň başyna çykdy. Portugallar ilkinji tapgyrda Kongo Demokratik Respublikasynyň milli ýygyndysy bilen 1:1 hasabynda deňme-deň oýnapdylar.

Özbegistanyň milli ýygyndysy bolsa ikinji gezek ýeňlip, henizem utuk gazanyp bilmedi. Birinji tapgyrda Fabio Kannawaronyň topary Kolumbiýanyň milli ýygyndysyndan 1:3 hasabynda ýeňlipdi. Iki tapgyrdan soň özbek ýygyndysy dört toparyň arasynda soňky orunda ýerleşýär.

Soňky, üçünji tapgyrda 28-nji iýunda Portugaliýanyň milli ýygyndysy Kolumbiýanyň milli ýygyndysy bilen duşuşar. Şol gün Özbegistanyň milli ýygyndysy Kongo Demokratik Respublikasynyň milli ýygyndysyna garşy meýdança çykar.