Portugaliýanyň janköýerleriniň gahary aradan çykan Žotanyň sahypasyna çenli baryp ýetdi

Futbol boýunça 2026-njy ýyldaky dünýä çempionatynyň ilkinji tapgyrynda Portugaliýanyň milli ýygyndysy garaşylmadyk ýagdaýda Kongo Demokratik Respublikasynyň milli ýygyndysyndan utuk alyp bilmedi. Roberto Martinesiň şägirtleri topa 75 göterim gözegçilik eden hem bolsalar, garşydaşyndan az urgy geçirip, has pes garaşylýan gol görkezijisini döretdiler. Portugallar derwezä bary-ýogy bir gezek takyk urgy geçirip bildiler.

Kriştianu Ronaldu karýerasynda altynjy dünýä çempionatynda çykyş etdi, emma ol duşuşykda diňe birnäçe amatly pursady elden gidirdi. 90 minudyň dowamynda Ronaldu top bilen diňe 25 gezek duşuşdy.

Şondan soň Portugaliýanyň käbir janköýerleri sosial ulgamlarda milli ýygyndynyň futbolçylaryna garşy nägilelik bildirip başladylar. Olar toparyň şowsuz çykyşyny futbolçylaryň Ronalduny ýeterlik derejede top bilen üpjün etmezligi bilen düşündirdiler. Janköýerleriň pikirine görä, top ýygy-ýygydan diňe Ronaldu berilmeli.

Ilkinji tankytlaryň nyşany Brunu Fernandeş boldy. «Mançester Ýunaýtediň» ýarymgoragçysy Ronalduny äsgermezlik etmekde aýyplandy we hatda haýbatly habarlar hem alyp başlady. Muňa garamazdan, ikinji ýarymda hut Ronaldu Brunonyň bir amatly pursady netijelendirmegine päsgel beripdi.

Brunu Fernandeşi goldap, Žoau Neweş bilen Fransişku Konseýsau çykyş etdiler. Olar Ronaldunyň toparyň beýleki futbolçylaryndan tapawutly däldigini aýtdylar.

– Ronaldu milli ýygyndynyň beýleki agzalary ýaly futbolçy. Ol hem topara kömek etmeli. Biz diňe oňa oýnamaga borçly däl – diýip, ýaş futbolçylar bellediler.

Bu sözlerden soň gaharly janköýerleriň hüjümi Žoau Neweşe garşy gönükdirildi. Hatda onuň söýgülisi hem tankytlaryň nyşanyna öwrüldi. Soňra Ronaldunyň söýgülisi Joržina Rodrigesiň ýaş nesil barada ýaňsylaýjy ýazgy goýandygy barada maglumatlar ýaýrady. Şeýle-de bolsa, Žoau Neweşiň söýgülisiniň Ronalduny tankytlaýandygy baradaky ýazgylaryň galp bolandygy belli boldy.

Ýagdaý munuň bilen çäklenmedi. Käbir janköýerleriň hereketleri has-da geň galdyryjy görnüşe eýe boldy. Müňlerçe adam aradan çykan portugaliýaly hüjümçi Diogu Žotanyň sosial ulgam sahypalaryna girip, Ronalduny has köp top bilen üpjün etmelidigi barada teswirler ýazdylar.

Käbir adamlar bolsa adamkärçiliksiz sözleri hem ýazdylar. Olaryň arasynda "Diogunyň ýerine Brunu bolmaly eken" ýa-da "Žota Ronalduny ýeterlik top bilen üpjün etmändigi üçin şeýle ykbala mynasyp boldy" diýen ýaly teswirler hem boldy.

Bu ýagdaý futbol jemgyýetinde uly geň galma döretdi. Köp adamlar Portugaliýanyň käbir janköýerleriniň şeýle hereketlerini berk ýazgaryp, futboluň hiç wagt şahsy duşmançylyga ýa-da aradan çykan adamlaryň hormatyna dil ýetirmäge sebäp bolmaly däldigini bellediler.

Soňky ýyllarda Kriştianu Ronaldu bilen baglanyşykly jedeller köp bolup geçse-de, bu gezek käbir janköýerleriň eden hereketleri hatda Portugaliýanyň öz içinde hem uly nägilelige sebäp boldy.