Wiktor Munýos resmi ýagdaýda "Liwerpula" geçdi

Angliýanyň «Liwerpul» topary 22 ýaşly ispan ganat hüjümçisi Wiktor Munýosy resmi ýagdaýda öz düzümine goşandygyny yglan etdi. Bu barada mersisaýd toparynyň metbugat gullugy habar berdi.

Şeýlelikde, soňky günlerde žurnalist Fabrizio Romanonyň beren maglumatlary doly tassyklandy. «Liwerpul» – «Osasuna» bilen ylalaşyk gazanyp, ýaş futbolçy bilen uzak möhletli şertnama baglaşdy. Resmi beýannamada şertnamanyň möhleti açyk görkezilmese-de, ozal çap edilen maglumatlara görä, Munýos bilen alty ýyllyk şertnama baglaşyldy we ol 2032-nji ýylyň tomsuna çenli dowam eder.

Transferiň umumy bahasy 40 million ýewro hökmünde bahalandyrylýar. Bu puluň ýarysy, ýagny 20 million ýewrosy Pamplonanyň «Osasuna» toparyna degişli bolsa, galan 20 million ýewro futbolçynyň öňki topary bolan Madridiň «Realyna» geçiriler. Sebäbi madridliler oýunçynyň hukuklarynyň 50 göterimine eýelik edýärdi.

Şeýle hem «Liwerpul» Wiktor Munýos üçin «Nýukasl Ýunaýtediň» öňüne geçmegi başardy. «Nýukasl» birnäçe gün bäri futbolçyny öz düzümine çekmäge synanyşsa-da, mersisaýdlylar soňky pursatda gepleşiklere goşulyp, oýunçynyň razylygyny gazandy.

22 ýaşly futbolçy öz futbol ýoluny ilki «Barselonanyň» ýaşlar düzüminde başlap, soňra Madridiň «Realynyň» akademiýasyna geçdi. 2025-nji ýylyň tomsunda bolsa «Osasuna» toparynyň düzümine goşuldy.

Geçen möwsümde Wiktor Munýos ähli ýaryşlarda 36 duşuşykda meýdança çykdy. Ol bu oýunlarda ýedi gezek tapawutlanyp, bäş asist berdi. Şol üstünlikli möwsüm ýaş futbolçynyň bazar bahasynyň hem ýokarlanmagyna getirdi. "Transfermarkt" portaly onuň häzirki bahasyny 30 million ýewro diýip kesgitleýär.

Munýos häzirki wagtda ABŞ-da geçirilýän 2026-njy ýyldaky dünýä çempionatynda Ispaniýanyň milli ýygyndysynyň düşelgesinde ýerleşýär. Baş tälimçi Luis de la Fuente ýaş hüjümçini ýaryşa alyp gitdi. Ispanlaryň Kabo-Werde bilen 0:0 hasabyndaky ilkinji duşuşygynda ol ätiýaçda galdy.

«Liwerpul» geçen möwsümden soň baş tälimçi wezipesine «Bornmutyň» öňki tälimçisi, bask asylly Andoni Iraolany getirdi. Täze tälimçiniň döwründe topar eýýäm düzüm güýçlendiriş işlerine başlady we Wiktor Munýos tomusky ilkinji uly transferleriň biri boldy.