Futbol sanlarda: Messi bilen Mbappe rekordlary täzeledi, Holand bolsa Norwegiýanyň taryhyna girdi

Futbol boýunça 2026-njy ýyldaky dünýä çempionatynyň toparçalaýyn tapgyrynda 16-njy iýundan 17-nji iýuna geçilýän gije geçirilen duşuşyklar diňe bir netijeleri bilen däl, eýsem birnäçe taryhy rekordlar bilen hem ýatda galdy. Lionel Messi, Kilian Mbappe we Erling Holand dünýä futbolynyň taryhyna täze sahypalary goşdy.

Gijäniň esasy gahrymany Argentinanyň milli ýygyndysynyň kapitany Lionel Messi boldy. Alžire garşy geçirilen duşuşykda 38 ýaşly hüjümçi het-trik edip, toparynyň 3:0 hasabyndaky ýeňşiniň baş sebäpkäri boldy. Messi 17-nji, 60-njy we 76-njy minutlarda tapawutlandy.

Bu oýun Messi üçin birnäçe aýratyn rekord bilen tamamlandy. Ol dünýä çempionatlarynyň taryhynda alty dürli mundialda çykyş eden ilkinji futbolçy boldy. Şeýle hem bu onuň Argentinanyň milli ýygyndysyndaky 200-nji duşuşygy hökmünde hasaba alyndy. Şeýlelikde, Messi milli ýygyndylar derejesinde 200 duşuşyk geçiren taryhdaky üçünji futbolçy boldy. Bu sanawda diňe Portugaliýanyň ýygyndysynyň hüjümçisi Kriştianu Ronaldunyň (227 oýun) we Kuweýtiň öňki futbolçysy Bader Al-Mutawanyň (202 oýun) görkezijileri has ýokarydyr.

Messi Alžire garşy meýdança kapitanyň daňysyny dakynyp çykdy we dünýä çempionatlaryndaky kapitanlyk eden duşuşyklarynyň sanyny 20-ä ýetirdi. Şeýlelikde ol Meksikanyň ýygyndysynyň öňki kapitany Rafael Markesiň 17 we Argentinanyň rowaýaty Diego Maradonanyň 16 oýunlyk rekordlaryny yzda galdyrdy.

Alžire garşy geçirilen üç gol Messiniň dünýä çempionatlaryndaky gollarynyň sanyny 16-a ýetirdi. Şeýlelikde, ol Germaniýanyň meşhur hüjümçisi Miroslaw Klozeniň rekordyna şärik boldy. Mundan başga-da, Messi Braziliýanyň legendasy Ronaldonyň 15 golluk görkezijisini hem yzda galdyryp, dünýä çempionatlarynyň taryhynda Günorta Amerikanyň iň netijeli futbolçysy boldy.

Bu het-trik başga bir taryhy üstünligi hem getirdi. Messi dünýä çempionatlarynyň taryhynda het-trik eden iň ýaşuly futbolçy boldy. Ol bu netijäni 38 ýaş 359 günlüginde gazandy. Şeýle hem ol dünýä çempionatlarynda 11 dürli ýygyndynyň derwezesinden gol geçiren ilkinji futbolçy hökmünde taryha girdi.

Argentinaly ýyldyz häzirki wagtda professional karýerasynda 1157 duşuşykda 914 gol geçirdi. Şol gollaryň 120-si Argentinanyň milli ýygyndysynyň düzüminde geldi.

Fransiýanyň ýygyndysynyň hüjümçisi Kilian Mbappe hem Senegala garşy duşuşykda täze üstünliklere ýetdi. Ol 3:1 hasabyndaky ýeňişde iki gezek tapawutlanyp, milli ýygyndydaky gollarynyň sanyny 58-e ýetirdi. Şeýlelikde, bary-ýogy 99 duşuşykda Fransiýanyň milli ýygyndysynyň taryhyndaky iň netijeli futbolçy boldy we Oliwýe Žirunyň rekordyny täzeledi.

Mbappeniň dünýä çempionatlaryndaky gollarynyň sany bolsa 14-e ýetdi. Ol muny diňe 15 duşuşykda gazanyp başardy. Deňeşdirmek üçin, Miroslaw Kloze 16 gol geçirmek üçin 24 oýun geçirmeli bolupdy.

Şeýle hem Mbappe dünýä çempionatlarynda 13 gol derejesine iň çalt ýeten üçünji futbolçy hökmünde taryha girdi. Bu ugurda diňe fransuz Žýust Fonten we germaniýaly Gerd Müller ondan öňde ýerleşýär.

Norwegiýanyň ýyldyz hüjümçisi Erling Holand hem ilkinji dünýä çempionatyndaky çykyşyny ýatdan çykmajak etdi. Yragyň ýygyndysyna garşy geçirilen duşuşykda iki gol geçiren hüjümçi FIFA tarapyndan oýnuň iň gowy futbolçysy saýlandy.

25 ýaşly Holand dünýä çempionatlarynda çykyş eden ilkinji gününde Norwegiýanyň taryhyna girdi. Onuň 29-njy minutda geçiren goly Norwegiýanyň milli ýygyndysynyň XXI asyrdaky ilkinji dünýä çempionatyndaky goly boldy. Norwegiýalylar mundan öň iň soňky gezek 1998-nji ýylda mundialda çykyş edipdiler.

Holandyň ikinji goly bolsa başga bir rekord getirdi. Ol dünýä çempionatlarynda Norwegiýanyň milli ýygyndysynyň iň netijeli futbolçysy derejesine çykdy. Häzir onuň mundiallardaky gollarynyň sany iki bolup, ol Hýetil Andre Rekdalyň görkezijisini gaýtalady.

Gyzykly tarapy, Erlingiň kakasy Alf-Inge Holand hem Norwegiýanyň düzüminde 1994-nji ýyldaky dünýä çempionatynda çykyş edipdi. Şeýlelikde, Holandlar maşgalasy iki nesil boýunça dünýä çempionatynda oýnan futbolçylaryň hataryna goşuldy.