TÝL, TÝB - 2026. 13-nji tapgyryň netijeleri

Türkmenistanyň Ýokary ligasynda hem-de ýaşlar birinjiliginde 13-nji tapgyryň duşuşyklary geçirildi.

Ýokary ligada Aşgabat şäherindäki "Köpetdag sport toplumynda" geçirilen duşuşykda «Köpetdag» topary «Merwi» 2:0 hasabynda ýeňdi. Duşuşykdaky gollary 54-nji minutda Baýramgeldi Gulmaýew we 90+3-nji minutda Mekan Amannyýazow geçirdi.

Tapgyryň iň köp golly duşuşygy Aşgabat şäherindäki "Nusaý" stadionynda boldy. Onda «Arkadag» topary «Aşgabady» 7:1 hasabynda ýeňlişe sezewar etdi. Ýeňijileriň düzüminde Meýlis Diniýew 11-nji minutda, Rahman Myratberdiýew 14-nji we 18-nji minutlarda, Ilýas Çaryýew 45+1-nji minutda, Resul Hojaýew 55-nji minutda, Şamämmet Hydyrow 81-nji minutda hem-de Didar Durdyýew 89-nji minutda tapawutlandy. «Aşgabadyň» ýeke-täk goluny 54-nji minutda Garly Garlyýew geçirdi.

Türkmenbaşy şäherindäki "Şagadam" stadionynda geçirilen duşuşykda «Altyn Asyr» topary myhmançylykda «Şagadamy» 2:0 hasabynda ýeňdi. Toparyň gollaryny 7-nji minutda Begençmyrat Myradow we 30-njy minutda Bagtyýar Gürgenow geçirdi.

Tapgyryň soňky duşuşygy Balkanabat şäherindäki "Sport toplumynda" geçirildi. Onda «Ahal» topary «Nebitçini» 4:0 hasabynda ýeňdi. Duşuşykda Oraz Orazow 14-nji minutda hasaby açdy. Magtymberdi Berenow 83-nji minutda 11 metrlik jerime urgusyndan tapawutlandy. Bäşim Gurbanberdiýew bolsa 85-nji we 90+3-nji minutlarda iki gol geçirip, toparynyň uly hasaply ýeňşini üpjün etdi.

13-nji tapgyrdan soň «Arkadag» topary 39 utuk bilen ýaryş tertibiniň başynda barýar. 27 utukly «Ahal» ikinji, 26 utuk toplan «Altyn Asyr» bolsa üçünji orunda ýerleşýär.

Iň köp gol geçiren futbolçylaryň sanawynda «Arkadagyň» hüjümçisi Didar Durdyýew 12 gol bilen öňdeligi saklaýar. «Ahalyň» futbolçysy Süleýman Mirzoýew 6 gol bilen ikinji, «Arkadagyň» oýunçysy Rahman Myratberdiýew hem 6 gol bilen üçünji orny eýeleýär.

Türkmenistanyň ýaşlar birinjiliginde geçirilen 13-nji tapgyryň duşuşyklarynda hem gyzykly netijeler hasaba alyndy.

Aşgabat şäherindäki "Sport toplumynda" geçirilen duşuşykda «Köpetdag II» bilen «Merw II» toparlary 0:0 hasabyndaky deňlik bilen oýny tamamlady.

Tapgyryň iň uly hasaply ýeňşi Aşgabat şäherindäki "Aşgabat" stadionynda boldy. «Arkadag II» topary «Aşgabat II» toparyny 9:0 hasabynda ýeňdi. Süleýmannazar Gowşudow 8-nji, 24-nji, 38-nji we 45-nji minutlarda dört gol geçirdi. Pälwan Annaýew 10-njy minutda, Saparmyrat Annadurdyýew 28-nji minutda, Annamuhammet Rejepow 46-njy minutda, Batyr Begenjow 82-nji minutda hem-de Nurýagdy Baýramow 85-nji minutda tapawutlandy.

Awaza milli syýahatçylyk zolagyndaky "Awaza sport toplumynda" geçirilen duşuşykda «Altyn Asyr II» topary «Şagadam II» toparyny 3:0 hasabynda ýeňdi. Duşuşykdaky gollary 2-nji minutda Rahym Ýarow hem-de 55-nji we 75-nji minutlarda Weýisgeldi Orazdurdyýew geçirdi.

Balkanabat şäherindäki "Sport toplumynda" geçirilen duşuşykda «Ahal II» topary «Nebitçi II» toparyny 2:0 hasabynda ýeňdi. Meýlis Garlyýew 45+1-nji minutda hasaby açdy. Azatmuhammet Hajyýew bolsa 88-nji minutda toparynyň ikinji goluny geçirdi.

13-nji tapgyrdan soň «Arkadag II» topary 11 oýunda toplan 28 utugy bilen birinji orny eýeleýär. «Nebitçi II» 13 oýunda 24 utuk bilen ikinji, «Ahal II» bolsa 11 oýunda 23 utuk bilen üçünji orunda ýerleşýär.

Ýaşlar birinjiliginiň iň netijeli futbolçylarynyň sanawynda «Altyn Asyr II-niň» oýunçysy Weýisgeldi Orazdurdyýew 15 gol bilen öňdeligi saklaýar. «Ahal II-niň» futbolçysy Medetgeldi Çaryýew 11 gol bilen ikinji, «Nebitçi II-niň» oýunçysy Elýas Agöýliýew hem 11 gol bilen üçünji orunda barýar.

Duşuşyklaryň netijelerini we ýaryşyň tablisasyny biziň "Netijeler" bölümimizden yzarlap bilersiňiz.