"Real" Alwaro Arbeloa bilen hoşlaşdy

Madridiň «Real» topary baş tälimçi Alwaro Arbeloanyň wezipesinden gidendigini resmi taýdan yglan etdi. Topar ýaýradan beýanatynda öňki futbolçysyna eden hyzmatlary üçin minnetdarlyk bildirip, onuň geljekki işlerinde üstünlik arzuw etdi.

«Realyň» beýanatynda Arbeloanyň toparyň akademiýasyna gelen gününden bäri ýokary jogapkärçilik, wepalylyk we ussatlyk görkezendigi nygtaldy. Toparyň ýolbaşçylary onuň «Realyň» gymmatlyklarynyň aýdyň nusgasydygyny belläp, Madridiň toparynyň onuň üçin hemişelik öý bolup galjakdygyny aýtdylar.

Alwaro Arbeloa «Realyň» baş tälimçisi wezipesine 2026-njy ýylyň başynda bellenipdi. Ol bu orunda wezipesinden boşadylan Habi Alonsonyň ýerine geçipdi. Ispan hünärmeni toparyň başynda jemi 28 duşuşyk geçirdi. Şol oýunlaryň 18-sinde ýeňiş gazanyp, 2 duşuşykda deňme-deň oýnady we 8 gezek ýeňlişe sezewar boldy.

Arbeloanyň ýolbaşçylygynda «Real» Ýewropanyň iň abraýly klublar ýaryşynda çärýek finalda «Bawariýadan» asgyn geldi. Şeýle-de topar Ispaniýanyň çempionlygy ugrunda alnyp barlan göreşde «Barselonadan» yzda galyp, möwsümi ikinji orunda tamamlady.

Alwaro Arbeloa futbolçy hökmünde hem «Realyň» taryhynda möhüm orun eýeleýär. Ol köp ýyllap Madridiň toparynyň köýnekçesinde çykyş edip, birnäçe baýraklaryň eýesi boldy. Şonuň üçin hem onuň topar bilen hoşlaşmagy köpsanly janköýerler tarapyndan aýratyn üns bilen garşylandy.

Soňky günlerde «Realyň» täze baş tälimçisi baradaky gürrüňler hem güýçlendi. Köpçülikleýin habar beriş serişdeleriniň maglumatlaryna görä, Arbeloanyň ýerine portugaliýaly hünärmen Žoze Mourinýonyň bellenmegi tas tassyklanan ýagdaýda. Mourinýo mundan öň hem «Realda» işläp, topary birnäçe ýyllap dolandyrypdy.

Toparyň ýolbaşçylary täze tälimçi baradaky resmi kararyň ýakyn wagtda yglan edilmegine garaşylýandygyny belleýär. Şeýlelikde, «Real» täze möwsüme täze tälimçi bilen girişmek üçin möhüm üýtgeşmeleri amala aşyrýar.