FIFA dünýä çempionaty üçin täze dabaralary girizýär

Futbol boýunça 2026-njy ýylda geçiriljek dünýä çempionatynda oýunlaryň öňüsyrasyndaky dabaralar täze görnüşe eýe bolar. FIFA-nyň prezidenti Janni Infantino bu täzelikleriň ýaryşyň täsirliligini ýokarlandyrmak we janköýerleriň futbol baýramçylygyna has ýakyndan gatnaşmagyny üpjün etmek maksady bilen girizilýändigini mälim etdi.

Täze düzgünlere görä, her duşuşygyň öňüsyrasynda milli ýygyndylaryň sanawyna girizilen ähli futbolçylar meýdana çykar. Döwlet senalary ýaňlanýan mahaly oýunçylar merkezi tegelekde ýerleşdirilen ýörite baýdagyň daşyna ýygnanarlar. Şeýle hem eminler iki toparyň arasynda durup, ähli gatnaşyjylar biri-birine garşy ýüzlenip ýerleşerler.

Janni Infantinonyň sözlerine görä, bu täze dabaralar toparlaryň jebisligini, milli buýsanjyny we dünýä çempionatynyň aýratyn ähmiýetini has aýdyň görkezmäge kömek eder. FIFA-nyň ýolbaşçysy dünýä çempionatynyň diňe bir futbol ýaryşy däl, eýsem dünýäniň dürli künjeklerinden gelen janköýerleri birleşdirýän uly baýramçylykdygyny nygtady.

Ýaryşyň soňky tapgyrlarynda dabaralar has-da täsirli bolar. Ýarym final we final ýaly möhüm duşuşyklaryň öňüsyrasynda reňkli tüsseler, pirotehniki işler görkeziler we beýleki ýörite effektler ulanylar. FIFA bu ädimi dünýä çempionatynyň dabaraly keşbini has-da güýçlendirmek üçin amala aşyrýar.

2026-njy ýylyň futbol boýunça dünýä çempionaty 11-nji iýundan 19-njy iýula çenli ABŞ-da, Kanadada we Meksikada geçiriler. Bu ýaryş taryhda ilkinji gezek 48 milli ýygyndynyň gatnaşmagynda geçirilip, dünýä çempionatlarynyň iň ulysy bolar.

Şol bir wagtyň özünde FIFA uzak ýyllaryň dowamynda dowam eden möhüm hyzmatdaşlygyň hem tamamlanjakdygyny mälim etdi. FIFA bilen meşhur stiker we kolleksiýa albomlaryny öndürýän "Panini" kompaniýasynyň arasyndaky hyzmatdaşlyk 2030-njy ýylda geçiriljek dünýä çempionatyndan soň tamamlanar.

Bu hyzmatdaşlyk ýarym asyrdan gowrak wagt bäri dowam edýär. Ilkinji resmi Panini albomy 1970-nji ýylda Meksikada geçirilen dünýä çempionatynyň öňüsyrasynda neşir edilipdi. Häzirki wagtda şol albom kolleksiýaçylaryň arasynda örän gymmatly hasaplanýar we onuň bahasy internet auksionlarynda 11 müň ýewro çenli ýetýär.

2031-nji ýyldan başlap bolsa FIFA-nyň ýaryşlaryna degişli kolleksiýa önümlerini "Fanatics" öndürer. Janni Infantino täze hyzmatdaşlygyň janköýerleriň futbol bilen arabaglanyşygyny has-da ösdürjekdigini we futbolyň ösüşi üçin goşmaça maliýe mümkinçiliklerini döredjekdigini aýtdy.

Şeýlelikde, 2026-njy ýylyň dünýä çempionaty diňe bir täze 48 toparly formaty bilen däl, eýsem täze dabaralary, janköýerler üçin taýýarlanan täzelikleri we FIFA-nyň geljekki taslamalary bilen hem dünýä futbolynyň taryhynda aýratyn orun eýelemäge taýýarlanýar.