Abdukodir Husanow Aziýanyň iň gymmat futbolçysy boldy

Özbegistanyň milli ýygyndysynyň we «Mançester Siti» toparynyň goragçysy Abdukodir Husanow "Transfermarkt" portalynyň soňky täzelenmesinden soň Aziýanyň iň gymmat futbolçysy adyna eýe boldy.

22 ýaşly futbolçynyň transfer bahasy birbada 15 million ýewro ýokarlanyp, 50 million ýewro derejesine ýetdi. Şeýlelikde, ol ýaponiýaly futbolçylar Kaişu Sano bilen Takefusa Kubony yzda galdyryp, Aziýa yklymyndaky iň gymmat futbolçy boldy.

Soňky möwsüm Husanow üçin örän üstünlikli geçdi. Özbegistanly goragçy «Mançester Sitiniň» düzüminde ähli ýaryşlarda 37 duşuşyga gatnaşdy. Ol gol ýa-da asist bilen tapawutlanmasa-da, goragdaky ygtybarly oýny bilen toparynyň esasy futbolçylarynyň birine öwrüldi.

Möwsümiň dowamynda Husanow «Mançester Siti» bilen Angliýanyň Kubogyny hem-de Angliýanyň Ligasynyň kubogyny gazanmagy başardy. Ýaş futbolçynyň durnukly çykyşy onuň transfer bahasynyň ep-esli ýokarlanmagyna sebäp boldy.

"Transfermarkt" tarapyndan geçirilen soňky täzelenmede Husanow Angliýanyň Premýer-ligasynda bahasy iň köp ýokarlanan futbolçylaryň sanawynda hem sekizinji orny eýeledi. Umuman alanyňda, portal Premýer-ligada çykyş edýän 524 futbolçynyň bahasyny täzeläp çykdy.

Gyzykly tarapy, liganyň umumy transfer bahasy 209 million ýewro azalan hem bolsa, Angliýanyň Premýer-ligasy dünýäniň iň gymmat futbol çempionaty bolmagynda galýar. Häzirki wagtda ligadaky futbolçylaryň umumy bahasy 12,37 milliard ýewro deňdir.

Abdukodir Husanow üçin öňde ýene bir möhüm synag garaşýar. Ol Özbegistanyň milli ýygyndysy bilen 2026-njy ýyldaky dünýä çempionatyna gatnaşar. Bu ýaryş Özbegistan üçin taryhy waka bolup, milli ýygyndy ilkinji gezek dünýä çempionatynda çykyş eder.

Dünýä çempionatynyň toparçalaýyn tapgyrynda Özbegistanyň garşydaşlary Portugaliýanyň, Kolumbiýanyň we DR Kongonyň milli ýygyndylary bolar.

Soňky ýyllarda uly ösüş gazanan Abdukodir Husanow häzirki wagtda diňe bir Özbegistanyň däl, eýsem tutuş Aziýanyň iň gymmat futbolçysy hökmünde ykrar edildi. Şeýle hem onuň 50 million ýewrolyk transfer bahasy özbek futbolynyň taryhynda gazanylan iň ýokary görkezijileriň biri bolup durýar.