"PSŽ" rekordlara baý möwsümi başdan geçirdi

2025/26 möwsümi «PSŽ» üçin ýatdan çykmajak ýyllaryň biri boldy. Pariž topary diňe bir Fransiýanyň çempiony bolmak bilen çäklenmän, eýsem birnäçe taryhy rekordlary hem täzeledi. Luis Enrikeniň ýolbaşçylygyndaky topar içerki ýaryşlarda agdyklyk edip, Ýewropanyň iň güýçli toparlarynyň biri hökmünde öz ornuny ýene bir gezek tassyklady.

«PSŽ» bu möwsümde yzly-yzyna bäşinji gezek Fransiýanyň çempiony boldy. Şeýlelikde, parižliler bu netijäni gazanan ikinji fransuz topary hökmünde taryha girdi. Mundan öň diňe «Lion» topary bäş möwsüm yzygiderli çempion bolupdy.

Toparyň hüjüminde hem gyzykly ýagdaý emele geldi. 2017/18 möwsüminden bäri ilkinji gezek «PSŽ-niň» iň netijeli futbolçysy fransuz bolmady. Gruziýaly ýyldyz Hwiça Kwarasheliýa bilen fransuz hüjümçisi Usman Dembele möwsümi 19 gol bilen tamamlap, toparyň iň köp gol geçiren oýunçylary boldylar.

Hwiça aýratyn hem Çempionlar ligasynda ajaýyp çykyş etdi. Ol ýaryşyň taryhynda pleý-off tapgyryndaky yzly-yzyna ýedi duşuşykda gol ýa-da asist bilen tapawutlanan ilkinji futbolçy boldy. Bu görkeziji gruziýaly futbolçynyň Ýewropa futbolyndaky derejesini ýene bir gezek görkezdi.

Şeýle-de bolsa, «PSŽ-niň» hüjümçileri soňky 16 ýylda ilkinji gezek möwsümde 20 gollyk sepgide ýetip bilmediler. Soňky gezek şeýle ýagdaý 2009/10 möwsüminde bolupdy. Şol möwsümde Mewlýut Erdingiň 19 goly toparyň iň ýokary görkezijisi bolupdy.

Baş tälimçi Luis Enrike hem birnäçe möhüm üstünligi gazandy. Ispan hünärmeni Çempionlar ligasynda 50 ýeňşi gazanan iň çalt tälimçi boldy. Munuň üçin oňa bary-ýogy 77 duşuşyk gerek boldy. Şeýle hem onuň «PSŽ-däki» ýeňiş göterimi 69 göterime ýetdi. Bu bolsa toparyň taryhyndaky iň gowy bäşinji görkeziji hasaplanýar.

Çempionlar ligasynyň finalyna çenli ýetendigine garamazdan, parižlileriň goragynda käbir kynçylyklar boldy. Topar ýaryşyň dowamynda 22 gol geçirdip, XXI asyrda Çempionlar ligasynyň finalyna çykan toparlaryň arasynda iň köp gol geçirden topar boldy.

Möwsümiň iň gyzykly wakalarynyň biri hem Dro Fernandes bilen baglanyşykly boldy. Ol şu möwsümde iki dürli güýçli çempionatda altyn medal gazanan ýeke-täk futbolçy hökmünde taryha girdi. Futbolçy hem «Barselonanyň» düzüminde La Liganyň çempiony boldy, hem-de «PSŽ» bilen Fransiýanyň çempionlygyny gazandy.

Derwezeçi Matweý Safonow hem öz adyny rekordlar sanawyna ýazdyrdy. Ol Klublaýyn dünýä çempionatynyň finalynda «Flamengo» bilen geçirilen duşuşykda dört penalti urgusyny saklady. Bu görkeziji başga bir fransuz derwezeçisi Lýuka Şewalýeniň tutuş möwsümde 26 duşuşykda gazanan netijesine deň boldy.

«PSŽ» bu ýyl Ýewropanyň iň ýakyn derbileriniň birini hem geçirdi. «Pariž» topary bilen geçirilen duşuşyga gitmek üçin futbolçylara "Park de Prens" stadionyndan bary-ýogy 19 metr ýol geçmek ýeterlik boldy. Hut şol duşuşykda topara Liga 1-iň çempionlyk kubogy hem gowşuryldy.

Parižliler ýene bir taryhy üstünligi gazandylar. Olar Fransiýanyň futbol taryhynda yzly-yzyna iki möwsümde Çempionlar ligasynyň ýa-da Ýewropa ligasynyň finalyna çykan ilkinji topar boldy.