WC-2026. Belgiýanyň milli ýygyndysy düzümini mälim etdi

Belgiýanyň milli ýygyndysynyň baş tälimçisi Rudi Garsiýa 2026-njy ýylyň dünýä çempionaty üçin ýygyndynyň 26 oýunçydan ybarat düzümini yglan etdi. "Gyzyl şeýtanlar" dünýä çempionatynyň toparçalaýyn tapgyrynda Müsür, Eýran we Täze Zelandiýa bilen bir toparda çykyş eder.

Belgiýanyň düzüminde toparyň esasy tejribeli ýyldyzlarynyň ählisi diýen ýaly orun aldy. «Mançester Sitiniň» ýarymgoragçysy Kewin De Bruýne, «Realyň» derwezeçisi Tibo Kurtua, «Trabzonsporyň» goragçysy Tomas Menýe, «Atletikonyň» tejribeli oýunçysy Aksel Witsel hem-de «Napoliniň» hüjümçisi Romelu Lukaku ýygynda çagyryldy.

Belgiýanyň milli ýygyndysynyň taryhyndaky iň köp gol geçiren futbolçy bolan Lukaku şikesler sebäpli kyn möwsüm geçirse-de, tälimçiler düzüminde öz ornuny saklap galdy. Hüjümçi häzirki wagta çenli milli ýygyndynyň düzüminde 124 duşuşykda 89 gol geçiripdir. Dünýä çempionatynda onuň öňündäki esasy wezipe öňki netijeliligini dikeltmek bolar.

Derwezeçileriň arasynda Tibo Kurtua bilen birlikde «Mançester Ýunaýtediň» derwezeçisi Senne Lammens we «Strasburgyň» ýaş derwezeçisi Maýk Penders hem düzümde bar. Şeýle-de Fransiýanyň Liga 1 çempionatynda üstünlikli çykyş eden başga bir oýunçy – «Lilliň» hüjümçisi Matias Fernandes-Pardo ilkinji gezek milli ýygynda çagyryldy. Ispaniýanyň milli ýygyndysynda çykyş etmäge hem mümkinçiligi bolan futbolçy Belgiýanyň saýlawyny etdi.

Rudi Garsiýa ýygyndyny düzende tejribe bilen ýaş futbolçylaryň arasynda deňagramlylygy saklamaga synanyşandygyny aýtdy. Tälimçi toparyň içinde agzybirligiň esasy ähmiýete eýedigini nygtady.

– Biz saýlama tapgyrda gowy çykyş eden toparyň binýadyny saklap galdyk. Toparyň içindäki sazlaşyk we oýunçylaryň biri-birini doldurmagy örän möhüm boldy. Maksadymyz toparçada birinji orny eýeläp, indiki tapgyra çykmak. Ýöne biziň arzuwymyz has uly – dünýä çempionlygy ugrunda göreşmek – diýip, Rudi Garsiýa aýtdy.

Belgiýanyň milli ýygyndysynyň DÇ-2026 üçin düzümi:

Derwezeçiler: Tibo Kurtua, Senne Lammens, Maýk Penders.

Goragçylar: Timoti Kastan, Zeno Debast, Maksim De Keýper, Koni De Winter, Brendon Mehele, Tomas Menýe, Natan Ngoý, Hoakin Seýs, Artur Teat.

Ýarymgoragçylar: Kewin De Bruýne, Amadu Onana, Nikolas Raskin, Ýuri Tilemans, Hans Wanaken, Aksel Witsel.

Hüjümçiler: Şarl De Ketelare, Žeremi Doku, Matias Fernandes-Pardo, Romelu Lukaku, Dodi Lukebakio, Diego Moreýra, Aleksis Salemakers, Leandro Trossard.

Belgiýanyň milli ýygyndysy dünýä çempionatyndaky ilkinji duşuşygyny 16-njy iýunda Sietl şäherinde Müsüriň milli ýygyndysyna garşy geçirer. 22-nji iýunda Los-Anjelesde Eýran bilen duşuşjak "gyzyl şeýtanlar" toparçadaky soňky oýnuny 27-nji iýunda Wankuwer şäherinde Täze Zelandiýa garşy geçirer.