La Liga. "Barselona" Flik bilen şertnamasyny uzaltdy

Kataloniýanyň «Barselona» topary baş tälimçisi Hans-Diter Flik bilen täze şertnama baglaşdy. Bu barada Ýewropanyň birnäçe abraýly neşirleri habar berdi. Täze ylalaşyga görä, germaniýaly hünärmeniň şertnamasy 2028-nji ýylyň tomsuna çenli uzaldyldy. Mundan başga-da, şertnamada ýene bir möwsüm – 2029-njy ýylyň tomsuna çenli uzaltmak mümkinçiligi hem göz öňünde tutulýar.

Habarlarda bellenilişine görä, täze şertnama oýunçy agenti Pini Zahawiniň gatnaşmagynda ylalaşyldy. Şertnamadaky goşmaça bir ýyllyk mümkinçilik toparyň belli sport maksatlaryna ýetmegi bilen işjeňleşdiriler. Şeýlelikde, «Barselonanyň» ýolbaşçylary Fligiň ýolbaşçylygynda alnyp barylýan taslama doly ynam bildirýändigini görkezdi.

Hans-Diter Flik «Barselona» bilen uly üstünlik gazanyp başlady. Katalon topary 2025/26 möwsüminde möhletinden öň Ispaniýanyň çempiony boldy. «Barselona» çempionlygy öz meýdançasynda geçirilen El-Klasikoda «Realy» 2:0 hasabynda ýeňmek bilen resmi taýdan üpjün etdi. Bu taryhda ilkinji gezek La Liganyň ykbalynyň hut El-Klasikoda çözülmegi boldy.

Duşuşykda hasaby 9-njy minutda Markus Reşford açdy. 18-nji minutda bolsa Ferran Torres toparynyň artykmaçlygyny iki gola çykardy. Şeýlelikde, «Barselona» 91 utuk toplayp, ýaryşyň tamamlanmagyna üç tapgyr galanda çempionlygyny üpjün etdi.

Bu üstünlik Hans-Diter Fligiň ýolbaşçylygyndaky «Barselona» üçin yzly-yzyna ikinji La Liganyň çempionlygy boldy. Şeýle-de topar öz taryhyndaky 29-njy Ispaniýanyň çempionlygyny gazandy.

Şonuň üçin hem toparyň ýolbaşçylary Flik bilen hyzmatdaşlygy dowam etdirmek kararyna geldi. Ýakyn günlerde «Barselona» tarapyndan täze şertnama boýunça resmi beýannamanyň hem çap edilmegine garaşylýar.