Championship. "Kowentri" APL-a dolandy, "Lester" bolsa düşmek howpynda

Angliýanyň çempionşip ligasynda möwsümiň iň möhüm pursatlarynyň biri bolup geçdi: «Kowentri Siti» topary Premýer-liga çykmagy resmi taýdan üpjün etdi, «Lester Siti» bolsa tersine, ligadan düşmek howpy bilen ýüzbe-ýüz boldy.

«Kowentri Siti» möwsümiň tamamlanmagyna üç tapgyr galanda iň ýokary liga çykmagy kepillendirdi. Topar häzirki wagtda 43 oýundan soň 86 utuk toplap, ýaryş tertibinde öňdeligi ynamly saklaýar we ilkinji iki ornuň birini eýelejekdigi anyk boldy. Bu bolsa olaryň gönüden-göni Premýer-liga çykýandygyny aňladýar.

Bu üstünlik toparyň baş tälimçisi Frenk Lempard bilen berk bagly. Ol 2024-nji ýylyň noýabr aýynda «Kowentri Siti» toparyna geleninde, topar bary-ýogy 17-nji orunda ýerleşýärdi. Şol wagtdan bäri topar düýpli özgerişleri başdan geçirdi. Lempardyň ýolbaşçylygynda 79 oýunda 43 ýeňiş gazanyldy we topar gysga wagtda çempionşipiň öňdebaryjysyna öwrüldi.

Geçen möwsümde hem «Kowentri» Premýer-liga çykmaga golaýlapdy, emma pleý-off tapgyrynda saklanypdy. Bu gezek bolsa topar möwsümiň dowamynda has durnukly çykyş edip, maksadyna gönüden-göni ýetdi. Möwsümiň başyndaky ýokary netijeler, utuk rekordlary we aýratyn-da standart ýagdaýlardan netijelilik olaryň üstünlikli ýolunyň esasy sebäpleriniň biri boldy.

Frenk Lempardyň tälimçilik karýerasy hem bu üstünlik bilen täze derejä çykdy. Ol öň «Derbi Kaunti», «Çelsi» we «Ewerton» ýaly toparlarda işläpdi. Käbir ýerlerde üstünlik gazansa-da, käbir ýerlerde şowsuzlyklar hem boldy. Şondan soň tälimçi öz üstünde işlemek üçin arakesme alyp, Pep Gwardiola we Tomas Frank ýaly tälimçileriň tejribesini öwrenipdi. Netijede, «Kowentri» bilen uly ösüş gazanyp, topary aşakdan ýokary çykardy.

«Kowentri Siti» üçin bu üstünlik diňe sport taýdan däl, eýsem taryhy taýdan hem aýratyn ähmiýetli. Topar soňky 25 ýylda köp kynçylyklary başdan geçirdi – maliýe meseleleri, utuklaryň aýrylmagy, pes ligalara çenli düşmek, janköýerleriň nägileligi we hatda öý stadionyndan başga ýerlerde çykyş etmek ýaly ýagdaýlar boldy. Şeýle kynçylyklardan soň olaryň täzeden Premýer-liga dolanmagy klub üçin täze döwrüň başlanýandygyny görkezýär.

Soňky gezek «Kowentri Siti» Angliýanyň iň ýokary ligasynda 2000/2001 möwsüminde çykyş edipdi. Indi bolsa 25 ýyldan soň olar ýene-de ýurduň iň güýçli ligasynda çykyş etmäge mümkinçilik aldy. Janköýerler üçin bu aýratyn duýguly pursat boldy – toparyň üstünlikleri uly şatlyk bilen garşylandy.

Şol bir wagtyň özünde, Angliýanyň başga bir meşhur kluby – «Lester Siti» üçin ýagdaý düýbünden tersine ösýär. Bir wagtlar, 2016-njy ýylda Premýer-liganyň çempiony bolan topar häzirki wagtda çempionşipde galmak ugrunda göreş alyp barýar.

Topar möwsümiň dowamynda örän durnuksyz çykyş etdi. Yzly-yzyna birnäçe oýunda ýeňiş gazanyp bilmezligi olaryň ýagdaýyny has-da kynlaşdyrdy. Umumylykda diňe 11 ýeňiş gazanylmagy hem olaryň pes çykyşynyň aýdyň görkezijisidir. Üstesine-de, maliýe düzgün bozmalary sebäpli utuklaryň aýrylmagy ýagdaýy has agyrlaşdyrdy.

Häzirki wagtda «Lester Siti» ýaryş tertibinde 23-nji orunda ýerleşýär we halas ediji zolagyndan birnäçe utuk yzda galýar. Möwsümiň tamamlanmagyna bary-ýogy üç tapgyr galan ýagdaýynda olaryň ýagdaýy gaty kyn bolup görünýär. Bilermenler toparyň çempionşipden hem düşmek mümkinçiligini örän ýokary – hatda 99% töweregi diýip bahalandyrýarlar.

Bu ýagdaý toparyň janköýerleri üçin uly lapykeçlik boldy. Bir wagtlar ýurduň iň güýçli klublarynyň biri bolan «Lester Siti» häzirki wagtda pes ligalara düşmek howpy bilen ýüzbe-ýüz boldy.