Premier League: 8-nji tapgyryna syn
09.10.2023ý.
Angliýanyň çempionaty «Premier Ligada» 8-nji tapgyryň duşuşyklary tamamlandy. Ýekşenbe güni oýnalan 4 duşuşygyň 3-si deňlikde tamamlandy. Tapgyryň merkezi oýnunda-da «Arsenal» ahyry güýçli garşydaşyny ýeňmegi başardy. «Çelsi» kem-kemden özüni dürseýär, «Mançester Ýunaýted» soňky minutlarda ýeňşini baýram etdi.
«Tottenham» ýeňlişsiz 1-nji orunda barýar
Tapgyr «Luton Tawn» – «Tottenham» duşuşygy bilen başlap, myhmanlar 2-nji ýarymy 1 oýunçy kem oýnandyklaryna garamazdan, täze transfer Miki Wan de Weniň 52-nji minutdaky goly bilen 1-0 hasabynda ýeňiş gazandy. «Tottenham» topar ýeňlişsiz ýörişini dowam etdirip, olar häzirki wagtda sanawyň başyny çekýärler.
«Mançester Ýunaýted» soňky demde
Soňky tapgyrlaryň şowsuz netije görkezýän kluby «Mançester Ýunaýted» bu şowsuzlygyny soňky minutlarda ýeňmegi başardy. Öz meýdançasynda «Brentford» bilen duşuşan mankunianlar 26-njy minutda Matias Ýenseniň goluna çäre tapyp bilmedi. Ýöne ruhdan düşmedik «Mançester Ýunaýtedde» 87-nji minutda Skott MakTomineý meýdança girdi. Ol ilki 90+3-nji minutda hasaby deňlese, 90+7-nji minutda 2-nji goluny geçirip, toparyna taryhy ýeňiş gazandyrdy.
«Çelsiniň» yzly-yzyna 2-nji ýeňşi
Londonyň «Çelsi» topary yzly-yzyna 2-nji ýeňşini gazanyp, kem-kemden özüni dürseýändigini görkezdi. Myhmançylykda «Býornli» bilen duşuşan «Çelsi» garşydaşynyň 1-0 öňe saýlanandygyna garamazdan, 4-1 hasabynda ýeňiş gazanmagy başardy. «Çelsi» toparyna ýeňiş getiren gollary Al-Dahil (42, ö.d.), Palmer (49 p), Sterling (65) hem-de Jekson (75) geçirdi.
Ýekşenbe günki oýunlarda-da «West Ham» – «Nýukasl», «Braýton» – «Liwerpul» duşuşyklary 2-2, «Wulwerhempton» – «Aston Willa» duşuşygy-da 1-1 deňlikde tamamlandy. Londondaky oýunda «West Ham» Souçekiň 8-nji minutdaky goly bilen öňe geçdi. 57-nji we 62-nji minutlarda tapawutlanan Isak «Nýukasly» öňe saýlady. West Ham» topary Mohamed Kudusyň 89-njy minutdaky goly bilen ýeňlişden halas boldy.
Edil şonuň ýaly, «Braýton» – «Liwerpul» duşuşygy hem 2-2 deňlikde tamamlanyp, duşuşykda ýer eýeleri 20-nji minutda Adingranyň goly bilen öňe saýlandy. Ýöne 1-nji ýarym tamamlanmank, «Liwerpulyň» ýyldyz oýunçysy Mohamed Salah ilki 40-nji minutda hasaby deňledi, 45+1-nji minutda-da penaltiden tapawutlanyp, toparyny öňe çykardy. Oýnuň tamamlanmagyna 11 minut galanda-da, penalti urgusyna sebäp bolan Dank hasaby deňläp, günäsini ýuwdy.
«Arsenal» 8 ýyldan soň «Mançester Sitini» ýeňdi
Tapgyryň merkezi duşuşygynda-da «Arsenal» çempionatda 8 ýyldan bäri ýeňip bilmeýän garşydaşy «Mançester Sitiden» 1-0 hasabynda üstün çykdy. Ýeke-täk goly 86-njy minutda 2-nji ýarymyň başynda oýna giren Gabriel Martinelli geçirdi. Şunlukda, «Arsenal» topary «Mançester Siti» çempionatda 2015-nji ýyldan soň ilkinji gezek ýeňdi. Şeýle-de, Pep Guardiolany ilkinji gezek ýeňen Mikel Artetanyň şägirtleri 2012-nji ýyldan soň «Mançester Sitini» gol geçirtmezden ýeňmegi başardy. «Arsenal» soňky gezek «Mançester Sitini» gol geçirtmezden 2012-nji ýylda tälimçisi Mikel Artetanyň 87-nji minutdaky ýeke-täk goly bilen ýeňipdi. Gol geçirtmezden gazanylan soňky 2 ýeňşiň gollarynyň birmeňzeş wagtlarda geçirilmegi sosial mediada uly seslenme döretdi.
Tamamlanan 8-nji tapgyrdan soň 20 utuk toplan ýeňlişsiz barýan Londonyň 2 topary – «Tottenham» bilen «Arsenal» 1-2-nji orunlary paýlaşýarlar. «Mançester Siti» soňky 5 ýylda ilkinji gezek çempionatda yzly-yzyna 2 oýunda ýeňildi. «Bornmut» bilen «Şeffild Ýunaýtediň» bolsa entek hem ýeňşi ýok.
Çempionatyň 9-njy tapgyry milli ýygyndylaryň duşuşyklary sebäpli 12 günlük arakesmeden soň geçiriler.
«Premier Ligada» 8-nji tapgyryň netijeleri:
«Luton Tawn» – «Tottenham» – 0-1;
«Ewerton» – «Bornmut» – 3-0;
«Fulham» – «Şeffild Ýunaýted» – 3-1;
«Mançester Ýunaýted» – «Brentford» – 2-1;
«Börnli» – «Çelsi» – 1-4;
«Kristal Palas» – «Nottingam Forest» – 0-0;
«Wulwerhempton» – «Aston Willa» – 1-1
«West Ham» – «Nýukasl» – 2-2;
«Braýton» – «Liwerpul» – 2-2;
«Arsenal» – «Mançester Siti» – 1-0
Çeşme: SalamNews
