UCL. 1/8 final tapgyrynda ýene dört duşuşyk geçiriler

UEFA-nyň Çempionlar ligasy ýaryşynyň 1/8 final tapgyrynda ýene birnäçe möhüm duşuşyk geçiriler. Bu oýunlarda Ýewropanyň dürli çempionatlarynyň güýçli toparlary çärýek final ugrunda göreşer.

11-nji martda Aşgabat wagty bilen sagat 22:45-de Germaniýanyň «Baýer» topary öz meýdançasynda Angliýanyň «Arsenal» toparyny kabul eder. Duşuşyk Lewerkuzendäki "BaýArena" stadionynda geçiriler. Pleý-off tapgyrynda «Baýer» iki oýnuň jemi boýunça «Olimpiakos» toparyndan 2:0 hasabynda üstün çykypdy. Umumy tapgyryň netijesinde bolsa «Arsenal» 24 utuk toplap, ýaryşyň sanawynda 1-nji orny eýeläp, gönüden-göni 1/8 finala çykypdy. Bu jübütde jogap duşuşygy 18-nji martda Londondaky "Emireýts" stadionynda geçiriler.

12-nji marta geçilýän gije Aşgabat wagty bilen sagat 01:00-da Fransiýanyň «PSŽ» topary Pariždäki "Park-de-Prens" stadionynda Angliýanyň «Çelsi» toparyny kabul eder. Duşuşygyň baş emini ispaniýaly Alehandro Ernandes bolar. Pleý-off tapgyrynda «PSŽ» iki oýnuň jemi boýunça «Monako» toparyny 5:4 hasabynda ýeňipdi. Umumy tapgyrda «Çelsi» 16 utuk toplap, 6-njy orny eýeläp, gönüden-göni 1/8 finala çykdy. Jogap duşuşygy 18-nji martda Londondaky "Stemford Brij" stadionynda geçiriler.

Şol gije sagat 01:00-da Madriddäki "Santýago Bernabeu" stadionynda «Real Madrid» – «Mançester Siti» duşuşygy hem bolar. Bu oýnuň baş emini italiýaly Mauritsio Mariani bolar. Pleý-off tapgyrynda «Real Madrid» iki oýnuň jemi boýunça «Benfika» toparyndan 3:1 hasabynda üstün çykdy. Umumy tapgyryň netijesinde bolsa «Mançester Siti» 16 utuk toplap, 6-njy orny eýeläp, 1/8 finala gönüden-göni çykdy.

Ýene bir duşuşykda Norwegiýanyň «Bude-Glimt» topary öz meýdançasynda Portugaliýanyň «Sporting» toparyny kabul eder. Bu oýun hem Aşgabat wagty bilen sagat 01:00-da başlar. Duşuşygyň baş emini slowakiýaly Iwan Kružlýak bolar. Pleý-off tapgyrynda «Bude-Glimt» iki oýnuň jemi boýunça «Inter» toparyny 5:2 hasabynda ýeňipdi. Umumy tapgyrda «Sporting» 16 utuk toplap, 7-nji orny eýeläp, gönüden-göni 1/8 finala çykdy.