Türkmenistanly zenan emin halkara ýaryşynyň finalynda eminlik etdi

Günorta-Gündogar Aziýa oýunlarynyň çäginde zenanlaryň arasynda geçirilen futbol bäsleşiginiň finalynda türkmenistanly FIFA-nyň emini Kristina Bersenýowa eminlik etdi. 

Bäsleşigiň dowamynda birnäçe duşuşykda kömekçi eminiň wezipesini ýerine ýetiren türkmenistanly eminiň görkezen ussatlygyny nazara alan guramaçylar zehinli eminimizi Filippinleriň hem-de Wýetnamyň zenanlar ýygyndy toparlarynyň arasynda geçirilen final oýnunda eminiň kömekçisiniň wezipesini ýerine ýetirmäge ynandylar.

Tailandyň Çonburi şäherinde geçirilen final duşuşygynda Filippinleriň hem-de Wýetnamyň zenanlar ýygyndy toparlary duşuşdylar. Esasy wagty 0:0 hasabynda tamamlanan duşuşykda oýundan soňky bellenen 11 metrlik urgulary şowly ýerine ýetiren Filippinleriň zenanlar ýygyndy topary baş baýraga mynasyp boldy. Bu duşuşykda awstraliýaly baş emin Rebekka Durkaunyň kömekçileriniň wezipesini Kristina Bersenýowa bilen laosly Çanthawong Phutsawan ýerine ýetirdiler.

Şu ýyldan başlap halkara ýaryşlaryna kömekçi emin hökmünde gatnaşyp başlan K.Bersenýowanyň AFK-nyň geçirýän bäsleşiklerine dördünji gezek çagyrylandygy bellenilmäge mynasypdyr. 

Türkmenistanly zenan eminiň şunuň ýaly abraýly ýaryşyň finalynda eminlik etmegi Türkmenistanyň Futbol federasiýasynyň eminlerimizi dünýä derejesine çykarmak baradaky alyp barýan işleriniň netijesidir.

Häzirki wagtda TFF-niň Eminler bölümi ýaş eminler bilen bir hatarda zenan eminleriniň bu ugurda netijeli çykyş etmeklerini gazanmak üçin tapgyrlaýyn işleri durmuşa geçirýär. Onuň netijesinde häzirki wagtda zenan eminlerimiz bilen birlikde ýaş eminlerimize Ýokary liganyň hem-de ýaşlar birinjiliginiň duşuşyklarynda eminlik etmäge ynam bildirilýär. Bu bolsa öz gezeginde eminlerimiziň oýun babatynda tejribe toplamaga gowy şert döredýär.