La Liga. Rafinýanyň dubly we täze rekord

"La Liganyň" 16-njy tapgyrynda «Barselona» öz meýdançasynda «Osasuna» toparyny aňsatlyk bilen ýeňdi. Duşuşyk braziliýaly winger Rafinýanyň dublynyň hasabyna 2:0 hasaby bilen tamamlandy.
​
"Optanyň" maglumatlaryna görä, «Barselona» – «Osasunany» ýeňenden soň, 2017-nji ýyldan bäri ilkinji gezek "La Ligada" yzygiderli ýedi duşuşykda iki gol tapawudy bilen ýeňiş gazandy. Şonda topar yzly-yzyna sekiz şeýle ýeňiş gazanypdy: bäşisini Luis Enrikeniň, üçüsini bolsa Ernesto Walwerdeniň ýolbaşçylygynda.
​
​«Barselonanyň» hüjümçisi Rafinýa «Osasuna» garşy duşuşykda iň gowy oýunçylaryň biri boldy we dubl etdi. Onuň ikinji goly aýratyn täsirli boldy, çünki braziliýaly oýunçy uzak aralykdan güýçli urgy etdi.

• ​"Optanyň" maglumatlaryna görä, bu Rafinýanyň 2022/23-nji möwsüminden bäri «Barselonanyň» düzüminde ähli ýaryşlarda jerime meýdançasynyň daşyndan uran 10-njy goly boldy. Bu döwürde «Barselonanyň» beýleki oýunçylaryndan hiç biri köp gol geçirmediler – diňe Lamin Ýamal şol bir görkezijä eýedir.
​
​«Osasuna» bilen oýundan soň, «Barselona» «Real Madrid-den» ýedi utuk arany açdy. Ýöne Madrid klubynyň heniz bir oýny oýnalmadyk.