Taryh. 10 oýunda 66 gol we Boxing Day-iň manysy

26.12.2024ý.

Şu gün Günbatar Hristiýanlykda Boxing Day ýa-da Seýnt Stefen güni hökmünde giňden bellenilýär. Ýagny 26-njy dekabr Roždestwodan soň birek-birege sowgat bermek güni bolup, ol Britan arkalaşygyna girýän ýurtlarda Boxing Day ady bilen has giňden ýaýrandyr. Roždestownyň 2-nji güni bolan bu gün Çehiýada, Germaniýada, Awstriýada, Wengriýada, Niderlandlarda, Italiýada, Polşada, Slowakiýada, Sloweniýada, Horwatiýada, Daniýada, Finlýandiýada, Rumyniýada, Şwesiýada, Belgiýada, Norwegiýada, Latwiýada, Irlandiýada bolsa Seýnt Stefen güni diýlip bellenilýär.

Adynyň boks sporty bilen hiç hili baglanyşygy bolman, 1800-nji ýyllarda Britaniýada Şa zenany Wiktoriýanyň tagta çykmagyndan soň şeýle at bilen meşhurlyk gazanyp başlaýar. Aslynda şu günüň ady baýlaryň, aristokratlaryň öýlerinde işledýän işgärlerine ýa-da hyzmatkärlerine ýörite Roždestwo sowgadyny gutujykda berýän güni bilen baglanyşyklydyr (“box” – iňlis dilinde guty diýmegi aňladýar). Şol gutulary öýlerinde açmagy üçin ýa-da maşgalalaryna gowşurmagy üçin işgärlere 26-njy dekabry dynç güni hökmünde berilýär eken.

Futbolda bolsa, Beýik Britaniýada futbolyň has meşhur bolup başlan gününden bäri aýratyn ähmiýete eýedir. Şu gün Angliýanyň, şol sanda, Şotlandiýanyň, Irlandiýanyň esasy ligalarynda duşuşyklar geçirilýär. Kä halatlarda bir tapgyryň ähli oýny 26-njy dekabrda, kä halatlarda bolsa duşuşyklar 2-3 güne paýlanylýar. Şol günki duşuşyklar futbol janköýerlerine hem stadionda, hem-de ekranda uly şatlyk paýlaýar. Boxing Day-den 2-3 gün öňem, soňam ýene-de duşuşyklar geçirilýär. Garaz, dekabr aýynyň soňky 10, ýanwar aýynyňam ilkinji 5 gününde toparlar 3 ýa-da 4 tapgyryň duşuşyklaryny oýnaýarlar.

Boxing Day güni oýnalan duşuşyklaryň iň ýatda galany 1963-nji ýyldaky duşuşyklardyr. Ýagny mundan 61 ýyl ozal oýnalan 10 duşuşykda 66 gol geçirilýär. Ortaça her duşuşyga 6,6 goldan düşüp, bu görkeziji Boxing Day günlerindäki hasaba alnan iň ýokary netijedir. Şol gün duşuşyklar 10-1, 2-8, 6-1, 1-5, 4-4, 3-3 ýaly netijeler bilen tamamlanýar. Iň az gol geçirilen duşuşykda-da 2 gol hasaba alynýar.

Şol duşuşyklara gysgaça ser salsak, Londonyň “Fulham” topary öz meýdançasynda “Ipswiç Tawny” 10-1 hasabynda ýeňýär. Duşuşykda şotlandiýaly hüjümçi Grem Leggat 3 minutda 3 gol salyp, Ýokary Liganyň iň çalt het-trigini edýär. Ol ýene-de 1 gol geçirip, duşuşygy poker bilen tamamlaýar. “Fulham” topary şol möwsümde umumylykda 58 gol geçirýär we şonuň 17 göterimini şol duşuşykda derwezä girizýär. “Ipswiç” topary bolsa şol möwsümde 121 gol geçirdýär.

Iň golly 2-nji duşuşyk hem Londonda hasaba alnyp, “West Ham” şol wagt sanawyň lideri “Bläkbörn” toparyndan 8-2 asgyn gelýär.

“Mançester Ýunaýted” üçinem Roždestwo sowgady gowy bolmaýar. “Börnli” toparyndan 6-1 utulýar. Başga bir duşuşykda-da 6-1 netije hasaba alynýar. Rojer Hantyň 4 gol salan oýnunda möwsümi çempionlyk bilen tamamlan “Liwerpul” “Stok Sitiden” 6-1 hasabynda üstün çykýar.

“West Bromwiç” bilen “Tottenhamyň” duşuşygy 4-4, “Wulwerhempton” bilen “Aston Willanyň” hem-de “Nottingam Forest” bilen “Şeffild Ýunaýtediň” arasyndaky oýunlar bolsa 3-3 deňlikde tamamlanýar.

“Çelsi” myhmançylykda “Bläkpuly” 5-1 ýeňýär. “Şeffild Wensdeý” öz meýdançasynda “Boltondan” 3-0 üstün çykýar. Iň az golly oýunda-da “Lester” öz meýdançasynda “Ewertony” 2-0 ýeňýär. Şol möwsümlerde çempionatda 22 klub çykyş edýärdi we “Arsenal” – “Birmingem” duşuşygy bolsa güýçli ümür sebäpli soňa goýulýar.  

1963-nji ýylyň 26-njy dekabrynda Boxing Day gününde oýnalan duşuşyklaryň netijeleri:

Bläkpul – Çelsi: 1-5

Börnli – Man Ýunaýted: 6-1

Fulham – Ipswiç: 10-1

Lester – Ewerton: 2-0

Liwerpul – Stok Siti: 6-1

Nottingam Forest – Şeffild Ýunaýted: 3-3

Şeffild Wensdeý – Bolton: 3-0

West Bromwiç – Tottenham: 4-4

West Ham – Bläkbörn: 2-8

Wulwerhempton – Aston Willa: 3-3

Bizi yzarlaň, biziň bilen galyň!