Futzal. Arkadag şäherinde mekdep okuwçylaryň arasynda ýaryş geçirilýär.

26.12.2024ý.

Arkadag şäherinde mekdep okuwçylaryň gatnaşmagynda futzal bäsleşigi geçirilýär.

Türkmen halkynyň Milli Lideri, Gahryman Arkadagymyzyň hem-de hormatly Prezidentimiziň tagallalary netijesinde sport ýurduna öwrülen eziz Watanymyzda sportuň beýleki görnüşleri bilen birlikde futbola hem uly üns berilýär. Bu ugurda alnyp barylýan işler geljekde dürli ýaşdaky ýygyndy toparlarymyza halkara arenasynda netijeli çykyş etmäge giň şertleri döreder. 

Türkmenistanyň Futbol federasiýasynyň Arkadag şäheriniň bilim müdirligi bilen bilelikde guramagynda Arkadag şäherindäki orta mekdeplerde bilim alýan mekdep okuwçylaryň gatnaşmagynda geçirilýän futzal bäsleşigi hem ýurdumyzda futboly ösdürmekde alnyp barylýan işleriň özboluşly beýany boldy.

Ýakynda badalga berlen bäsleşik Arkadag şäherindäki orta mekdeplerine wekilçilik edýän toparlaryň 16-synyň gatnaşmagynda geçirilip, onda ýeňijiler iki ýaş derejesinde kesgitlener. 6-7-nji synplaryň arasyndaky duşuşyklar Arkadag şäheriniň 2-nji orta mekdebiniň sport toplumynda geçirilýän bolsa, onda 8-9-njy synpda okaýan mekdep okuwçylarynyň arasyndaky bäsleşigi 3-nji orta mekdebiň sport toplumy kabul edýär.

Bäsleşigiň düzgünnamasyna laýyklykda, toparçalaryň hersinde birinji orunlary eýelän toparlar final duşuşygynda güýç synanyşmaga mümkinçilik alarlar.

Bäsleşikleriň ýeňijileri 27-nji dekabrda mälim bolar.

Çeşme: TFF