La Liga. Ispaniýada super duşuşyk

21.12.2024ý.

Şu gije Ispaniýanyň çempionaty “La Ligada” super duşuşyk oýnalar. Aşgabat wagty bilen ýarygijeden soň, 01:00-da başlanjak we “Türkmenistan Sport”, “Match TV” ýaly teleýaýlymlarda görkeziljek duşuşykda utuklary deň bolan 2 topar – sanawyň lideri “Barselona” bilen 2-nji ýerdäki “Atletiko Madrid” duşuşar. Duşuşyga Rikardo De Burgos Bengoeçea eminlik eder. Duşuşykda madridliler ýeňiş gazansa, onda olar 1-nji orna geçer. Deňlikde tamamlanan ýagdaýynda bolsa, “Real” ýekşenbe gününde ýeňiş gazansa, 1-nji orna beýgeler.  

“Barselona” topary çempionatda “Atletiko Madride” 5 oýundan bäri ýeňilmän gelýär. Şeýle-de, “Atletiko Madrid” soňky gezek myhmançylykda 19 ýyla golaý öň ýeňipdi. 2006-njy ýylyň fewralynda 18 ýaşly Fernando Torresiň goly bilen 1-0 ýeňen “Atletiko Madride” şondan bäri güýçli garşydaşyny myhmançylykda ýeňmek başardanok. Ýagny dürli ýaryşlarda geçirilen 24 oýunda “Atletiko” myhmançylykda katalonlary ýeňip bilmän gelýär.  

“Barselona” “La Ligada” “Atletiko Madridi” 80 oýunda, “Atletiko Madrid” bolsa 52 oýunda ýeňlişe sezewar etdi. 42 duşuşyk bolsa deňlikde tamamlandy.

Bizi yzarlaň, biziň bilen galyň!