TFF-da futbol ligalaryny döretmek barada maslahat geçirildi

06.12.2024ý.

Ýaş futbolçylaryň gatnaşmagynda Türkmenistanyň futbol ligalaryny döretmek barada maslahat geçirildi.

Türkmenistanyň Futbol federasiýasynyň edara binasynda Ýurdumyzda ýetginjekler we ýaşlar futboluny ösdürmek barada maslahat geçirildi.

Geljegi nazarlaýan maslahata ýurdumyzyň Ýokary ligasynyň, Türkmenistanyň Futbol federasiýasyna agza futbol mekdepleriniň hem-de Türkmenistanyň bedenterbiýe we sport baradaky döwlet komitetiniň futbol mekdepleriniň wekilleri gatnaşdylar.  

Türkmenistanyň Futbol federasiýasynyň ýolbaşçylar düzüminiň tagallasy netijesinde guralan maslahatyň dowamynda 2025-nji ýylyň futbol möwsüminden başlap geljegi nazarlaýan meýilnamalaýyn taslamalary durmuşa geçirmek baradaky teklipler diňlenildi. Maslahatyň dowamynda ýurdumyzda ýetginjekler hem-de ýaşlar ligalaryny döretmek barada pikir alşylyp, 2025-nji ýylyň futbol möwsüminden başlap 15 ýaşa çenli (U15), 16 ýaşa çenli (U16) hem-de 18 ýaşa çenli (U18) futbolçylardan düzülen toparlaryň gatnaşmagynda geçiriljek ýurdumyzyň futbol ligalaryny döretmek barada karara gelindi.

Umuman, geçirilen maslahatyň dowamynda çykyş eden futbol hünärmenleriň teklipleri diňlenilip, Türkmenistanyň Futbol federasiýasynyň ýolbaşçylar düzümi tarapyndan bu babatda golaý wagtda giň gerimli işleriň geçiriljekdigi bellenildi.

Çeşme: TFF