Taryh. 125 ýyl ozal şu gün...

29.11.2024ý.

“Barselona” 125 ýaşady.

Şu gün Ispaniýanyň iň meşhur 2 futbol klubunyň biri bolan “Barselonanyň” esaslandyrylanyna 125 ýyl dolýar. 1899-njy ýylyň 29-njy noýabrynda Joan Gamper atly futbolçynyň ýolbaşçylyk etmeginde şweýsar, katalon, nemes hem-de iňlis futbolçylary tarapyndan esaslandyrylýar.

Klub 1910-njy ýyla çenli professional bolmadyk ýaryşlara gatnaşýar. 1910-njy ýyla çenli Ýewropadaky ýaryşlarda çykyş edýär. UEFA esaslandyrylýança Ýewropanyň ýaryşlarynda “Barselona” 14 kubok gazanýar. 1910-njy ýylda ilkinji gezek Ispaniýanyň Şa Kubogy ýaryşynyň ýeňijisi bolýar. 1928-nji ýylda “La Liga” döredilýär we “Barselona” hem çykyş edip başlan ilkinji klublaryň biri bolýar.

Taryhy syýasy wakalardan doly bolan klub Ispaniýanyň “La Ligasynda” aşaky liga düşmedik 3 toparyň biridir. Beýlekiler “Real Madrid” bilen “Atletik Bilbao” toparlarydyr. “Barselona” topary taryhynda “La Ligada” 27 gezek çempion bolup, bu ugurda “Real Madridden” soň 2-nji ýerde barýar.

Taryhynda Ispaniýanyň Şa Kubogyny 31 gezek aldy we bu sanawda birinji ýeri eýeleýär. Ispaniýanyň Super Kubogyny 14 gezek alan “Barselona” topary “Copa Eva Duarte” (3), “Copa de la Liga” (2) ýaly häzirki wagtda bolmadyk ýaryşlarda-da ýeňşi bar.

Halkara ýaryşlarda – UEFA Çempionlar Ligasynda 5, ozalky UEFA Kubokçylaryň Kubogy ýaryşynda 4 gezek ýeňiji boldy. UEFA Super Kubogyny 5, öňki ýaryşlar – Şäherler arasy Ýarmarka Kubogyny 3, Latyn Kubogyny 2 gezek almagy başardy. FIFA Klublar arasy Kubogyny-da 3 gezek eýelän “Barselona” topary Katalon futbol çempionatynda 1901-1938-nji ýyllar aralygynda 23 gezek çempionlyk gazandy. Katalonýa Kubogyna 8, Katalonýanyň Super Kubogyna-da 2 gezek mynasyp boldy.

Düzüminde hemişe ýyldyz oýunçylaryň çykyş eden klubunda argentinaly super ýyldyz Lionel Messi rekord görkezijileriň köpüsinde iň öňdäki orny eýeleýär. Toparda çykyş eden futbolçylaryň arasynda ýüzlerçe ýyldyz oýunçylar bar.

Irki ýyllarda iňlisleriň tälim beren klubuň taryhyndaky iň başarnykly tälimçi Pep Guardioladyr. Jek Grinwell, Ýohan Kroýff, Luis Enrike, Frank Riiýkard. Lui Wan Gaal, Bobbi Robson, Helenio Herrera, Enrike Fernandes ýaly belli-belli tälimçiler kluba dürli ýyllarda tälim berip, dürli kuboklary gazandylar. 

Klu­byň il­kin­ji sta­dio­ny “Camp de Les Corts”.

Bizi yzarlaň, biziň bilen galyň!