Ispaniýanyň ýygyndysy milli rekordy täzeledi

21.11.2024ý.

2024-nji ýylda Ispaniýanyň milli futbol ýygyndysy resmi ýaryşlaryň çäginde geçirilen 17 oýnuň 14-sinde ýeňiş gazanyp, dostluk duşuşyklary hem hasaba alnanda, milli ýygyndynyň taryhynda iň ýokary rekordy goýdy diýip, «Livescore» habar berýär. Çeşmäniň habaryna görä, Ispaniýanyň milli ýygyndysynyň öňki iň gowy netijesi 2010-njy ýylda gazanylypdy. Şol ýyl “Gyzyl Furiýa” ýoldaşlyk duşuşyklary hem goşulanda, 17 oýnuň 13-sinde ýeňiş gazanyp, bir oýny deňlikde tamamlap, üç oýunda utulypdy. Mundan başga-da, 2010-njy ýylda ispaniýalylar Günorta Afrikada geçirilen Dünýä çempionatynda ýeňiji bolupdylar. 2024-nji ýylyň netijeleri boýunça, Ispaniýanyň milli ýygyndysy Germaniýada geçirilen Ýewropa çempionatynda çempion boldy. Milletler ligasynda bolsa topar 16 utuk gazanyp, toparçadaky garşydaşlaryndan ep-esli öňe geçdi. Ispaniýalylar ýaryşyň ikinji ornuny eýelän Daniýanyň milli ýygyndysyndan 8 utuk öňde tamamladylar. 2024-nji ýylda Ispaniýanyň milli ýygyndysy diňe bir gezek utuldy. Bu ýeňliş 23-nji martda Kolumbiýa bilen geçirilen dostluk duşuşygynda (0:1) bolup geçdi.

Bizi yzarlaň, biziň bilen galyň!