UEL. "Beşiktaş" – "Makkabi Tel-Awiw" duşuşygynyň geçiriljek ýeri belli boldy

13.11.2024ý.

UEFA Ýewropa Ligasy çäginde 28-nji noýabrda geçiriljek "Beşiktaş" bilen "Makkabi Tel-Awiw" toparlarynyň arasyndaky duşuşyk Wengriýanyň Debretsen şäherinde tomaşaçysyz geçiriler.

Türk kluby bu karary yglan etdi. Wengriýa bu oýny kabul etmäge razy bolan ýeke-täk ýurt boldy. Ilkibaşda Wengriýanyň resmileri oýny tomaşaçylar bilen geçirmek isleseler-de, "Makkabi" toparynyň Amsterdamda "Aýaks" bilen geçiren oýnundaky wakalar sebäpli duşuşygy ýapyk gapylaryň aňyrsynda geçirmek kararyna gelindi.

Ýatladyp geçsek, Amsterdamda geçirilen Ýewropa Ligasynyň çägindäki "Aýaks" – "Makkabi Tel-Awiw" (5:0) oýnundan soň, Ysraýyl klubynyň janköýerleri Palestinanyň baýdagyny ýakyp, şondan soň olara hüjümler bolupdy. Bu wakadan soň, adatdan daşary çäreler görülip, köçelerde polisiýa nobatçylyk edipdi. Ýahudy binalary goşmaça gorag bilen üpjün edilipdi.

Bizi yzarlaň, biziň bilen galyň!