Premier League. Erling Holand iň çalt 75 gol geçirip taryha girdi

10.11.2024ý.

«Mançester Siti» toparynyň hüjümçisi Erling Holand, Angliýanyň premýer-ligasynyň 11-nji tapgyrynda «Braýtona» (1:2) garşy geçirilen oýunda ýene bir pökgüsini tora girizdi. Norwegiýaly hüjümçi oýnuň 23-nji minutynda topy garşydaşyň toruna ibermek bilen öz adyny taryhda ýazdy.

Munuň netijesinde Holand premýer-ligada taryhdakylardan has çalt 75 pökgi geçirdi. Muňa ýetmek üçin oňa 77 oýun gerek boldy. Erling Holand, meşhur Alan Şirerden 16 oýun öň bu bellige ýetdi. Angliýanyň öňki kapitany 93 oýunda 75 pökgi geçirdi. Şeýle hem, Şirer premýer-liganyň iň köp pökgi geçiren oýunçysy (260 gol).

Umuman alanyňda, 24 ýaşly Holand şu möwsüm premýer-liganyň 11 oýnunda 12 pökgi geçirip, liganyň iň köp pökgi geçirenleriň sanawynda birinji orunda durýar.

Mundan başga-da, "Opta"-nyň habaryna görä, Holand karýerasynda ilkinji gezek bir pökgi geçiren premýer-ligadaky oýunda ýeňildi. Şu güne çenli Holand azyndan bir pökgi geçiren oýunlarda 40 ýeňiş we 6 deňme-deň oýnady.

Bizi yzarlaň, biziň bilen galyň!