Finalda 6-njy gezek 2 brazil kluby duşuşar

31.10.2024ý.

Günorta Amerikanyň Çempionlar Ligasy bolan Libertadores Kubogynda finala çykan toparlar belli boldy. Ýarym finalyň jogap oýunlarynda brazil klublary ýeňiş gazanyp bilmeselerem, öz meýdançalarynda gazanylan uly hasaply ýeňişler olaryň ikisiniňem finala çykmagy üçin ýeterlik boldy. Öz meýdançasynda Argentinanyň “Riwer Pleýt” toparyny 3-0 ýeňen Braziliýanyň “Atletiko Mineýro” myhmançylykda golsuz deňme-deň oýnap, finala adyny ýazdyrdy. “Atletiko Mineýro” topary 2013-nji ýyldan soň taryhynda 2-nji gezek finalda oýnar. Olar şol ýyl çempionlyk gazanypdy.

Beýleki finalçy-da “Botafogo” topary boldy. Öz meýdançasynda Urugwaýyň “Penýarol” toparyny 5-0 utan “Botafogo” myhmançylykda 3-1 asgyn geldi. Baez (31, 66) we Batistanyň (89) gollaryna Almada (88) bilen jogap beren “Botafogo” topary taryhynda ilkinji gezek Libertadores Kubogynyň finalyna çykdy.

Libertadores Kubogynyň finalynda 6-njy gezek 2 brazil topary duşuşar. Final duşuşygy 30-njy noýabrda Argentinanyň paýtagty Buenos Aýresdäki Monumental stadionynda oýnalar. Ýeňiş gazanan topar geljek ýyldaky FIFA Klublar arasy Dünýä Kubogyna gatnaşar.