Futzal. Owganystanyň topary Türkmenistanda dostluk saparynda boldy

31.10.2024ý.

Owganystanyň «Magtymguly Pyragy» atly futzal topary ýakynda ýurdumyzda dostluk saparynda boldy. Myhmanlar bir hepdelik gezelenç wagtynda Türkmenistanyň «Köpetdag», «Senagatbank» hem-de Mary welaýatynyň ýygyndy toparlary bilen üç sany ýoldaşlyk duşuşygyny geçirdiler. Şeýle hem sport ugrundaky mundan beýläkki hyzmatdaşlyk barada ylalaşyk gazanyldy.

Owganystanyň Hyrat şäherinden gelen topar 2022-nji ýylda döredildi. Bu toparyň düzümini Türkmen-owgan medeni birleşiginiň agzalary düzýär. Bu birleşik 2002-nji ýylda Türkmenistanyň we Owganystanyň medeniýet ugrundaky dostlukly gatnaşyklaryň ösdürilmegi üçin esaslandyryldy. Indi bolsa bu gatnaşyklar sport ugry bilen hem baýlaşdyrylar.

Owgan klubynyň baş tälimçisi Muhammet Amin Farhatyň aýtmagyna görä, toparyň «Pähim-paýhas ummany Magtymguly Pyragy» ýylynda Türkmenistana dostluk sapary bilen gelmegi ajaýyp sazlaşygy emele getirdi. Bu teklip ýokarda ady agzalan birleşik tarapynda orta atyldy. Topar ýurdumyzda türkmen myhmansöýerligi bilen garşylanyldy. Myhmanlar üçin sport hyzmatdaşlygy we dostluk duşuşyklaryndan başga-da, medeni maksatnama hem guraldy. Şeýlelikde, Owganystanyň wekiliýeti Aşgabatda Milli medeniýet merkezine, Türkmen halysynyň milli muzeýine we, elbetde, paýtagtymyzyň günorta tarapynda, Köpetdagyň eteginde ýerleşýän «Magtymguly Pyragy» medeni-seýilgäh toplumyna baryp gördürler.

Mary welaýatynyň dolandyryş merkezine guralan sapar wagtynda bolsa owgan topary ýerli topar bilen dostluk duşuşygyny geçirdi. Bu ýerde myhmanlar Beýik Ýüpek ýolunyň kerwenleriniň geçen taryhy ýadygärlikleri bolan «Gadymy Merw» taryhy we medeni ýadygärlikler goraghanasyna baryp gördüler. Şeýle hem, olar Sultan Sanjaryň haýbatly aramgähini we beýleki taryhy ýadygärlikleri görüp ruhlandylar.

"Magtymguly Pyragy" toparynyň oýunçylary görüp gören zatlaryndan täsirlenip, aýratyn güýç alyp, Mary welaýatynyň ýygyndysy bilen geçirilen duşuşykda ajaýyp, tehniki oýun görkezmegi başardylar we 3:2 hasaby bilen ýeňiş gazandylar.

Aşgabatly toparlar bilen geçirilen duşuşyklaryň netijelerine hem ser salalyň. Bu duşuşyklar Ahal welaýatynyň Änew şäherindäki sport mekdebinde geçirildi. Häzirki wagtda Türkmenistanyň Naýbaşy ligasynyň lideri bolan "Köpetdag" myhmanlary 10:6 hasaby bilen ynamly ýeňdi.

Naýbaşy ligada ikinji orunda barýan "Senagatbank" topary bilen oýun bolsa 2:2 hasabyndaky deňlik bilen tamamlandy.

"Magtymguly Pyragy" toparynyň Owganystandaky milli ýaryşlarda eden çykyşlary barada-da aýtsak, olaryň ikinji ligada başlanan professional karýerasy çempionlyk bilen tamamlandy. Geljek ýylda bolsa topar Türkmen-owgan medeniýet birleşiginiň wekili hökmünde birinji ligada medallar ugrundaky göreşe girişer.

Bizi yzarlaň, biziň bilen galyň!