UCL. Hem “Real”, hem-de “Bawariýa” ýeňildi

03.10.2024ý.

UEFA Çempionlar Ligasynda 2-nji tapgyryň galan 9 duşuşygynda garaşylmadyk hasaplar ýüze çykdy. Uzak wagtlap dowam eden ýeňlişsizlik seriýalary tamamlandy. Çempionlar Ligasynyň taryhynda ilkinji gezek bir gijede ispan klublarynyň 3-si ýeňildi.

Kubogyň häzirki çempiony “Real Madrid” myhmançylykda Fransiýanyň “Lill” toparyndan 1-0 hasabynda asgyn geldi. Ýeke-täk goly 45+3-nji minutda penaltiden amerikaly Jonatan Dewid geçirdi. 2-nji ýarymda “Realyň” eden tagallasy, Ançelottiniň oýunçy çalşyklary hasabyň üýtgemegine täsir etmedi we ispan kluby bu ýaryşda 14 oýundan soň ýeňlişe sezewar boldy. “Real Madrid” ähli ýaryşlary hasaba alanyňda, 36 oýundan bäri utulman gelýärdi we bu babatda öz rekordyny täzelemäge golaý gelipdi (4 oýun galypdy).

Ýene bir garaşylmadyk netije-de Angliýada hasaba alnyp, “Aston Willa” öz meýdançasynda “Bawariýadan” 1-0 hasabynda üstün çykdy. Duşuşykdaky ýeke-täk goly Noýeriň ýalňyşlygyndan soň 79-njy minutda 20 ýaşyndaky kolumbiýaly hüjümçi Jon Duran geçirdi. Şunlukda, “Aston Willa” topary “Bawariýanyň” toparçalaýyn tapgyrda 41 oýundan bäri ýeňilmän gelýän seriýasyna soňky nokady goýdy. “Bawariýany” UÇL-de toparçalarda soňky sapar hem Unaý Emeri ýeňipdi. 2017-nji ýylda Emeriniň tälimçiligindäki PSŽ öz meýdançasynda “Bawariýany” 3-0 hasabynda utupdy. Şeýle-de, Emeri portugaliýaly Žoze Mouriniodan soň “Bawariýany” 3 dürli topar bilen ýeňen 2-nji tälimçi hökmünde hasaba alyndy.

 “Ýuwentus” hem myhmançylykda “Leipsig” bilen duşuşdy. Ýer eýeleri Şeşkonyň gollary bilen 2 gezek öňe geçse-de, her saparynda Wlahowiç jogap berdi. 59-njy minutdan soň 1 oýunçy kem oýnan, derwezeçisi gyzyl kart alan “Ýuwentus” täze transferi Konseýsaunyň 82-nji minutdaky goly bilen ýeňşini baýram etdi.

“Žironanyň” öz meýdançasynda “Feýenoorddan” 3-2 hasabynda utulan tapgyrynda “Atletiko Madrid” hem myhmançylykda “Benfikadan” 4-0 ýeňildi.  

“Liwerpul” hem öz meýdançasynda “Bolonýany” Mak Allister hem-de Salahyň gollary bilen 2-0 ýeňdi.

2-nji oktýabrdaky duşuşyklaryň netijeleri: 

Şahtýor Donesk – Atalanta: 0-3 (Džimsiti 21, Lukman 33, Bellanowa 48)

Žirona – Feýenoord: 2-3 (Lopes 19, Wan de Beek 73 – Herrera 23 ö.d., Milambo 33, Kreýçi 79 ö.d.)

Aston Willa – Bawariýa: 1-0 (Jon Duran 79)

Dinamo Zagreb – Monako: 2-2 (Suçiç 45+3, Baturina 66 – Salisu 74, Zakariýa 90 p)

Liwerpul – Bolonýa: 2-0 (Mak Allister 11, Salah 75)

Lill – Real Madrid: 1-0 (Dewid 45+3 p)

Leipsig – Ýuwentus: 2-3 (Şeşko 30, 65 p – Wlahowiç 50, 68, Konseýsau 82)

Şturm Gras – Klub Brýugge: 0-1 (Solis 23)

Benfika – Atletiko: 4-0 (Aktürkoglu 13, Di Mariýa 52 p, Ba 75, Kökçü 84 p)

Bizi yzarlaň, biziň bilen galyň!