Türkmenistanyň ýetginjekler ýygyndysy Erzurumdaky ýaryşda ilkinji ýeňşini gazandy.

03.10.2024ý.

Türkmennistanyň futbol boýunça 17 ýaşa çenli ýetginjekler ýygyndysy şu günler Türkiýe Respublikasynyň Erzurum şäherinde geçirilýän halkara ýaryşda ilkinji ýeňşini gazandy. Düýn 2-nji oktýabrda “Ýüksek Irtifa” türgenleşik merkezinde geçirilen ikinji tapgyryň duşuşygynda ýaş futbolçylarymyz Azerbaýjanyň ýetginjekler ýygyndysyndan 3:0 hasabynda üstün çykdy. Şeýle hem düýn “B” toparçada geçirilen duşuşykda Özbegistanyň ýygyndysy gruziýaly futbolçylary 4:1 hasabynda ýeňdi.

Türkiýäniň Futbol federasiýasynyň guramagynda geçirilýän ýaryşa türki dilli döwletleriň bäşisi we myhman hökmünde Gruziýa gatnaşýar. “A” toparça wekilçilik edýän Ahmet Allaberdiýewiň şägirtleri birinji tapgyrda Türkiýäniň ýetginjekler ýygyndysyndan 0:3 hasabynda asgyn gelipdi.

Şu gün toparçada Türkiýe – Azerbaýjan duşuşygy geçiriler. Bu duşuşygyň netijesine laýyklykda, toparçadaky orunlaryň ählisi kesgitleniler. Yzda galan iki tapgyrda 3 utuk toplan bilen ýetginjekler ýygyndymyz, häzirlikçe, 3 utuk bilen ikinji orny eýeleýär. “B” toparçada bolsa Özbegistan bilen Gruziýanyň ýygyndylarynda 3 utuk bar. Gyrgyz ýygyndysy bolsa ilkinji duşuşygynda gruziýaly futbolçylardan 0:3 hasabynda ýeňlipdiler.

Ýaryşyň düzgünnamasyna laýyklykda, ýetginjekler ýygyndymyz toparçada näçenji orny eýelese, 6-njy oktýabr güni ugurdaş toparçada şol orny eýelän ýygyndy bilen duşuşar. Edil häzirki ýagdaýda türkmen ýygyndysynyň garşydaşy Gruziýanyň ýygyndysy bolup dur.

Türkiýedäki ýaryş türkmen ýygyndysy üçin Aziýanyň kubogy 2025-iň saýlama tapgyryna taýýarlygyň möhüm bölegi bolar. Türkmenistanly ýetginjek futbolçylar yklym ýaryşynyň saýlama duşuşyklaryny 23-27-nji oktýabr aralygynda Tailandda geçirerler. Bije çekişligiň netijesinde «D» toparça wekilçilik eden ildeşlerimiz 23-nji oktýabrda Tailandyň, 25-nji oktýabrda Hindistanyň, 27-nji oktýabrda bolsa Bruneý adalarynyň ýygyndylary bilen güýç synanyşarlar.

Türkiýäniň Futbol federasiýasynyň guramagynda geçirilýän türki dilli döwletleriň halkara ýaryşynyň netijeleri we geçiriljek duşuşyklaryň tertibi: 

01.10.2024 Gruziýa 3-0 Gyrgyz Respublikasy

01.10.2024 Türkiye 3-0 TÜRKMENISTAN

02.10.2024 Özbegistan 4-1 Gruziýa 

02.10.2024 TÜRKMENISTAN 3-0 Azerbaýjan 

04.10.2024 Gyrgyz Respublikasy - Özbegistan 

04.10.2024 Türkiye - Azerbaýjan 

06.10.2024 A2 - ornuny eýelän - B2 - ornuny eýelän

06.10.2024 A3 - ornuny eýelän - B3 - ornuny eýelän

06.10.2024 A1 - ornuny eýelän - B1 - ornuny eýelän

Çeşme: TFF