ACL Two. “Altyn Asyr” ikinji duşuşygyny geçirdi.

03.10.2024ý.

Aşgabadyň “Altyn Asyr” futbol topary düýn, 2-nji oktýabrda AFK-nyň ikinji derejeli Çempionlar ligasynyň toparçalaýyn bölegindäki ikinji duşuşygyny geçirdi. Paýtagtymyzyň “Aşgabat” stadionynda geçirilen duşuşykda Türkmenistanyň at gazanan tälimçisi Ýazguly Hojageldiýewiň şägirtleri Bahreýniň “”Al-Haldiýa toparyny kabul etdiler.

15,500 janköýeri stadiona ýygnan duşuşyk myhman toparyň 1:0 hasabyndaky ýeňşi bilen tamamlandy. Duşuşykdaky ýeke-täk goly 45+4-nji minutda Usama Bellatreçe geçirdi.

Bu duşuşygyň ýaryşyň “B” toparçasynyň çäklerinde geçirilendigini ýatladýarys. Toparçanyň ugurdaş duşuşygynda Yragyň “Eýr Fors” topary myhmançylykda Saud Arabystanynyň “Al-Tawun” toparyny 2:1 hasabynda ýeňdi.

Yzda galan iki tapgyryň duşuşyklaryndan soňra 6 utukly “Eýr Fors” toparçada birinji orny eýeleýär. “Al-Tawun” bilen “Al-Haldiýanyň” 3 utugy bar. “Altyn Asyra” bolsa heniz utuk gazanmak başardanok.

Toparçada üçünji tapgyryň duşuşyklary 23-nji oktýabrda geçiriler. Şol gün “Altyn Asyr” “Al-Tawunyň” myhmany bolar, “Eýr Fors” bolsa “Al-Haldiýany” kabul eder.

02.10.2024. AFC Champions League Two. «B» toparça. 2-nji tapgyryň netijesi:

«Altyn Asyr» (Türkmenistan) – «Al-Haldiýa» (Bahreýn) –0:1

[0:1] – 45’+4 Usama Bellatreçe

Geçirilen ýeri: «Aşgabat» köpugurly stadiony (Aşgabat ş.)

Duşuşygyň emini: Ahmad Ýakub Ibragim Ibragim (Iordan Haşemit Patyşalygy)

Kömekçi eminler: Hamis Kaýs Aýman Issa, Abu Obeýd Hamza Adel Ahmad (Iordan Haşemit Patyşalygy)

Ätiýaçdaky emin: Mohammad Hasan Mahmud Arafa (Iordan Haşemit Patyşalygy)

Gözegçi emin: Masud Moradi (Eýran Yslam Respublikasy)

Duşuşygyň Komissary: Mihail Tolkaçew (Gyrgyz Respublikasy)

"Altyn Asyr” – “Al-Haldiýa”: käbir statistiki görkezijiler

Aşgabadyň “Altyn Asyr” futbol topary AFK-nyň ikinji derejeli Çempionlar ligasynyň çäginde düýn Aşgabat şäherinde geçirilen duşuşykda Bahreýniň “Al-Haldiýa” toparyndan 0:1 hasabynda ýeňlen hem bolsa käbir statistiki görkezijiler babatynda garşydaşyndan üstün çykdy.

Käbir mysallara ýüzlensek, “Altyn Asyryň” duşuşygyň dowamynda pökgini dört gezek meýdanyň burçundan oýna girizendigini görýäris. “Al-Haldiýa” bolsa şeýle howply pursady diňe üç gezek döredip bildi.

“Altyn Asyryň” futbolçylary oýundan daşardaky ýagdaýa hem garşydaşa seredeniňde az düşdüler. Ol tutuş duşuşygyň dowamynda şeýle ýalňyşlygy bary-ýogy 3 gezek goýberdiler. “Al-Haldiýanyň” futbolçylary bolsa 6 gezek oýundan daşardaky ýagdaýda galdylar.

Türkmen futbolçylary duşuşykda oýnuň düzgünlerini hem az bozdular. Iordaniýaly emin olara diňe bir gezek sary duýduryş kartyny görkezdi. Bahreýnden gelen futbolçylar bolsa şeýle kartlaryň ikisini aldylar. Umuman, emin “Altyn Asyryň” oýunçylarynyň goýberen ýalňyşlyklary üçin 8, garşydaş toparyň futbolçylary üçin bolsa 9 gezek oýny saklamaly boldular.

Oýnuň 46 göteriminde pökgini saklan “Altyn Asyryň” garşydaş derwezä gönükdiren 5 urgusynyň biri göni bardy. Duşuşykda toparyň oýunçylary biri-biri bilen 401 gezek paslaşdylar, olaryň paslarynyň 75 göterimi takyk boldy.

Çeşme: TFF

Bizi yzarlaň, biziň bilen galyň!