TÝL. Serdar Gulyýewiň goly – 24-nji tapgyryň "Iň owadan goly".

21.09.2024ý.

«Nebitçiniň» hüjümçisi Serdar Gulyýewiň Balkan derbisinde «Şagadamyň» derwezesinden geçiren goly Türkmenistanyň futbol çempionatynyň Ýokary ligasynyň 23-nji tapgyrynyň iň owadan goly saýlanyldy. Ses berlişigiň Türkmenistanyň Futbol federasiýasynyň jemgyýetçilik torlaryndaky hasaby arkaly geçirilendigini ýatladýarys.

Gol nähili geçirildi?

Duşuşygyň 22-nji minudynda hüjüm «Nebitçiniň» öz ýarym meýdançasynda başlady. «Nebitçiler» hüjüme ýykgyn eden «Şagadamyň» futbolçylaryndan topy alyp, ony garşydaşyň ýarym meýdançasynda garaşyp duran hüjümçilere geçirmegi başardylar. Şol mahal hem hüjümiň sag ganatyndan Serdar Gulyýew öňe okduryldy. Ol jerime meýdançasyna golaý aralykdan özüne geçirilen topy derwezä dürs gönükdirip, duşuşykda «Nebitçiniň» ikinji goluny geçirdi. Bu gol hüjümçiniň Ýokary liganyň şu möwsümindäki ikinji goludyr.

23-nji tapgyrdaky Balkan derbisinde «Nebitçiniň» «Şagadamy» 2:1 hasabynda ýeňendigini ýatladýarys.

«Nebitçiden» ikinji owadan gol

Dört tapgyry yzda galan ses berlişimiziň iki ýeňijisi «Nebitçiden» çykdy. Başgaça aýtsak, her bir ýeňijiden soňra ikinji ýeňiji «Nebitçiniň» futbolçysy bolup gelýär. 21-nji tapgyryň netijeleri boýunça hem şu topardan Muhammet Annaýewiň geçiren golunyň ýeňiji bolandygyny ýatladýarys.

Bu iki ýagdaýy görkezýär. Birinji ýagdaý «Nebitçiniň» futbolçylarynyň owadan gollary geçirmekde ussatlygydyr. Ikinji ýagdaý bolsa «Nebitçiniň» janköýerleriniň ses berlişikde toparyň futbolçylaryny agzybirlik bilen goldaýanlygydyr.

Ses berlişigimiziň ilkinji dört tapgyrynda aşakdaky futbolçylar ýeňiji boldular:

20-nji tapgyr: Musa Nurnazarow, «Şagadam»;

21-nji tapgyr: Muhammet Annaýew, «Nebitçi»;

22-nji tapgyr: Mihail Titow, «Altyn Asyr»;

23-nji tapgyr: Serdar Gulyýew, «Nebitçi».

Janköýerleriň uly gyzyklanmasy

TFF tarapyndan geçirilýän ses berlişiklere futbol janköýerleriniň gyzyklanmasy tapgyrdan-tapgyra artýar. Şu gezekki ses berlişigimize-de olaryň müňlerçesi gatnaşyp, iň mynasyp gollara ses berdiler.

Türkmenistanyň Futbol federasiýasy milli çempionatymyzyň 24-nji tapgyryndaky iň owadan gollaryň ses berlişigini hem ýakyn günlerde yglan eder.

Çeşme: TFF