Serie A. "Romanyň" täze tälimçisi mälim edildi

19.09.2024ý.

Iwan Ýuriç resmi taýdan «Roma» toparyna ýolbaşçylyk etdi.

Hünärmeniň bellenilmegi Serie A toparynyň metbugat gullugy tarapyndan yglan edildi. 49 ýaşly horwat tälimçisi bir ýyllyk şertnama baglaşdy. Ýuriç «Romany» indiki möwsümde Çempionlar ligasyna gatnaşdyrmagy başarsa, şertnamanyň awtomatiki usulda uzaldylyp bilinjekdigi aýdylýar.

Ýuriç, möwsümiň başynda görkezen erbet netijeler sebäpli wezipesinden boşadylan italýan tälimçi Daniele de Rossiniň ornuna geldi. Hünärmen tälimçilik karýerasynda «Torino», «Ženoa», «Werona», «Krotone» we beýleki toparlar bilen işleşdi. 15 ýyl töweregi dowam eden tälimçilik karýerasynda Ýuriç hiç wagt Italiýany terk etmedi.

Italiýa çempionatynyň ilkinji dört tapgyrynda De Rossiniň ýolbaşçylygyndaky «Roma» ýekeje ýeňiş gazanyp bilmedi, üç gezek deňme-deň oýnady we bir gezek ýeňildi. Topar üç utuk bilen Serie A-da 16-njy ýerde durýar.

Bizi yzarlaň, biziň bilen galyň!