pfp.pt
Mergen Orazow Portugaliýa saparynyň netijeleri barada gürrüň berdi
17.09.2024ý.
Türkmenistanyň futbol boýunça milli ýygyndysynyň baş tälimçisi Mergen Orazow ýakynda Portugaliýadan gaýdyp geldi, ol dostlukly döwletde intensiw tejribe alyş sapagyny geçdi. Bu sapar türkmen futbolynyň ösdürilmegine täze mümkinçilikleri açyp, Orazow üçin gymmatly tejribä öwrüldi ― diýip, «Turkmenportal» ýazýar.
Mergen Orazowyň tejribe alyş maksatnamasy baý we netijeli boldy. Türkmenistanyň milli ýygyndysynyň baş tälimçisi Portugaliýanyň Futbol federasiýasynyň tehniki direktory Žoze Kouseýro bilen duşuşdy we liganyň gurluşyny hem-de zehinleriň ösdüriliş usullaryny ara alyp maslahatlaşdy. Mundan başga-da, Portugaliýanyň Futbol akademiýasyna baryp görüp, iň ýokary derejeli tälimçileri taýýarlamak boýunça öňdebaryjy ulgam bilen tanyşdy.
Tejribe alyş döwrüniň esasy pursaty Portugaliýanyň milli ýygyndysynyň baş tälimçisi Roberto Martines bilen geçirilen iki duşuşyk boldy. Mergen Orazow oýunlara taýýarlygy synlamaga we oýunlaryň jikme-jik seljerilmegine gatnaşmaga aýratyn mümkinçilik aldy.
Portugaliýanyň tejribesi: Türkmenistanda nämeler ornaşdyrylyp bilner?
Mergen Orazow Portugaliýanyň futbol tejribesinden Türkmenistanda ornaşdyrylyp boljak birnäçe ugurlary aýratyn belledi. Olaryň hatarynda futbolçylary bäş ballyk ölçeg boýunça bahalandyrmak ulgamyny aýratyn nygtady. Bu ölçeg diňe bir sport görkezijilerini däl, eýsem, oýunçylaryň özüni alyp barşyny hem öz içine alýar. «Baha berliş gizlin amala aşyrylýar. Ähli talaplar boýunça bäşlik alan oýunçy, eger-de şikesi ýok bolsa, awtomatiki ýagdaýda dalaşgärleriň sanawyna girýär» diýip, tälimçi düşündirdi. Şeýle-de Orazow ýaş oýunçylary milli ýygynda çekip, olary ösdürmek tejribesini we oýunlardan öňki seljeriş işlerini toparlaýyn esasda alyp barmalydygyny belledi. «Bu usul taktiki ugurlary jikme-jik öwrenmäge mümkinçilik berýär» diýip, ol aýratyn nygtady. Mergen Orazow alan tejribesine esaslanyp, milli ýygyndynyň taýýarlygynda birnäçe özgertmeleri amala aşyrmagy meýilleşdirýär. «Noýabr aýynda täze dalaşgärleri synagdan geçirmek üçin ýapyk türgenleşik ýygnanyşyklaryny we ýoldaşlyk duşuşyklaryny gurnamak meýilleşdirilýär» diýip, tälimçi aýtdy. Orazow bu ýygnanyşyklarda, esasan, ýaş oýunçylara aýratyn üns beriljekdigini nygtady. Milli ýygyndynyň iň ýakyn maksady Aziýa Kubogy 2027-iň saýlama tapgyrynda üstünlik gazanmak. «Biziň maksadymyz Aziýanyň çempionatyna çykmak» diýip, Orazow belledi.
Türkmenistanyň Futbol federasiýasynda täze özgertmeler
Milli ýygyndyda geçirilen işler bilen bir hatarda, Türkmenistanyň Futbol federasiýasynda-da döwrebaplaşdyrmak işleri batly depginde alnyp barylýar. Federasiýanyň täze düzgünnamasy işlenip düzülýär, şeýle-de Ýokary liganyň we Türkmenistanyň Kubogynyň oýunlarynyň wideoarhiwi döredilýär. «Klublar ähli oýunlaryň wideo ýazgylary bilen üpjün edilýär, bu bolsa olaryň birek-biregi öwrenip, oýunlara netijeli taýýarlanmagyna ýardam edýär» diýip, Mergen Orazow nygtady.
Federasiýanyň geljekki meýilnamalarynda türkmen oýunçylaryny halkara platformalarynda öňe sürmek boýunça hyzmatdaşlyklar hem bar. «Bu taslama oýunçylarymyzyň has güýçli çempionatlara gidip, futbolumyzyň derejesini ýokarlandyrmagyna kömek eder» diýip, Orazow düşündirdi.
Uzak möhletli ösüş strategiýasy
Türkmenistanyň Futbol federasiýasy oýunçylary taýýarlamagyň toplumlaýyn ulgamyny işläp düzýär, bu ulgam akademiýalardan başlap, professional derejä çenli dowam eder. Üç derejeli ulgamyň ― Ýokary liganyň, ýaşlaryň arasyndaky birinjiligiň we Birinji liganyň işini has kämil usullar bilen ýola goýmak meýilleşdirilýär.
Mergen Orazowyň sözlerine görä, maksat, oýunçyny 17 ýaşa çenli akademiýada taýýar edip, soňra oňa üç mümkinçilik hödürlemekdir: eger ol zehinli we fiziki taýdan taýýar bolsa, göni Ýokary liga gidip biler. Ýogsa-da, oňa Ýokary liga wekilçilik edýän klublaryň ýaşlar düzümlerinde oýnamak ýa-da Birinji ligada tejribe toplamak mümkinçiligi garaşýar.
Mundan başga-da, türkmen tälimçilerini okatmak üçin Portugaliýadan hünärmenleri çagyrmak meselesi hem göz öňünde tutulýar.
Roberto Martines bilen duşuşyk: täsirler we mümkinçilikler
Mergen Orazow Roberto Martinesiň açyklygyndan we tejribe paýlaşmaga taýýarlygyndan täsirlenendigini aýtdy. «Hiç hili gizlinlik, hiç hili päsgelçilik ýok – hemmeler paýlaşmaga we kömek etmäge taýýardyr» diýip, türkmen tälimçisi belledi. Türkmenistan bilen Portugaliýanyň federasiýalarynyň arasyndaky hyzmatdaşlyk boýunça Ylalaşyga gol çekilmeginiň mümkinçiligi ara alnyp maslahatlaşyldy. Portugaliýaly hünärmenler türkmen futbolynyň mümkinçiliklerine ýokary baha berýärler. Olar ýurduň ýaşlar ýygyndysynyň Uelsiň ýygyndysy bilen deňme-deň oýnandygyny aýratyn nygtadylar.
Mergen Orazowyň Portugaliýadaky tejribe alyş sapary türkmen futboly üçin täze mümkinçilikleri açdy. Täze tejribeler, oýunçylary we tälimçileri taýýarlamak ulgamynyň döwrebaplaşdyrylmagy we halkara hyzmatdaşlygynyň mümkinçiligi – bu ýagdaýlar Türkmenistanda futboluň ösüşiniň ýokary derejelere çykmagyna umyt berýär.
Bizi yzarlaň, biziň bilen galyň!
