News

AFC Cup: «Merw» saýlama tapgyrda ýeňiş gazanyp, pleý-offa çykdy

15.08.2023ý.

«Merw» Gyrgyzystanyň «Alaý» toparyny utup, AFK-nyň Kubogy ugrunda ýaryşyň «playoff» tapgyryna çykdy.

«Merw» futbol toparynyň oýunçylary AFK Kubogy ugrunda ýaryşyň deslapky tapgyrynda Gyrgyzystanyň Oş şäheriniň «Alaýyny» 1:0 hasabynda utup, ýaryşyň «playoff» tapgyryna çykmagy başardylar. Duşuşygyň 13-nji minudynda Musa Nurnazarow ýeňiş pökgüsini tora girizdi.

Oýun on müňden gowrak janköýeriň tomaşa etmeginde Marynyň «Sport toplumy» stadionynyň meýdançasynda geçirildi.

«Alaý» Gyrgyzystanyň ussat we köp baýrak alan futbol toparlarynyň biridir: ol 4 gezek (2013, 2015, 2016 we 2017-nji ýyllarda) çempion, iki gezek (2013, 2020-nji ýyllarda) Gyrgyzystanyň Kubogynyň eýesi, Naýbaşy kubogyň (2017, 2018, 2023-nji ýyllarda) häzirki üç gezek ýeňijisi we milli çempionatyň kümüş medalynyň (2022-nji ýylda) eýesidir.

Häzire çenli «Alaý» AFK Kubogy ugrunda ýaryşa dört gezek gatnaşdy: 2016-njy ýylda - deslapky bäsleşigiň «playoff» tapgyrynda we 2014, 2017 we 2018-nji ýyllarda – ýaryşyň toparlaýyn tapgyrynda çykyş etdi. Ýöne bir gezegem toparlaýyn bäsleşikden saýlanyp bilmedi.

Türkmenistanyň çempionatynyň häzirki bürünç medalynyň eýesi «Merw» 17 ýyldan soň Aziýanyň ähmiýeti boýunça ikinji derejeli möhüm klublaryň arasyndaky ýaryşda kubok ugrunda ikinji gezek güýç synanyşýar. 2006-njy ýylda ol «Dempo» (Hindistan) we «Al-Nasr» (Oman) toparlary bilen bir toparçada oýnap, toparlaýyn tapgyrdan geçip bilmedi.

«Merw» bilen «Alaý» 29 ýyl mundan ozal häzirki wagtda ýaryşy geçirilmeýän Aziýa Kuboklarynyň ýeňijileriniň kubogy ugrunda ýaryşda duşuşypdylar. 1994-nji ýylda Jambylda geçen saýlama tapgyryň çäklerinde Türkmenistandan, Gyrgyzystandan, Täjigistandan («Rawşan»), Özbegistandan («Pahtakor») we Gazagystandan («Taraz») bäş topar ýaryşyň indiki tapgyryna çykmaga ýeke-täk hukuk ugrunda göreşdi. Şonda «Merwiň» oýunçylary «Alaýy» 3:1 hasabynda utupdylar.

Bu gezek Murgabyň kenarynda topar üçin ýeňiş aňsat bolmady. Merwiň oýunçylary meýdançanyň burçundan oýna girizilen pökgi dürs urlandan soň öňe saýlandylar. Sag burçdan depilen topy Musa Nurnazarow kellesi bilen derwezä gönükdirdi.

«Alaý» hasaby deňlejek bolup köp synanşdy. Arakesmeden öň toparyň hüjümçisi jerime meýdançasynyň çäginden pökgini derwezäniň sag burçuna gönükdirdi. Emma oýnuň iň gowy oýunçysy diýlip ykrar edilen «Merwiň» derwezebany Merdan Saparow pökgini gaýtarmagy başardy.

Duşuşygyň ikinji ýarymynda Gyrgyz Respublikasynyň wise-çempiony meýdança eýeleriniň derwezesiniň öňünde howply pursatlary döretse-de, hasaby deňläp bilmedi.

Duşuşykdan soňky metbugat-maslahatynda «Alaýyň» baş tälimçisi Aýbek Tatanow «Merw» toparyny AFK-nyň Kubogy ugrunda ýaryşyň indiki tapgyryna çykmagy bilen gutlap: «Oýna beýle köp janköýer geler pikir etmedim. Olaryň goldawy şu gün «Merwiň» ýeňiş gazanmagyna kömek edendir diýip hasaplaýaryn» diýdi.

«Merwiň» tälimçisi Witaliý Alikperow hem janköýerlere goldawy üçin hoşallyk bildirdi.

«Ozaly bilen janköýerlere goldawy üçin köp sag bolsun aýdasym gelýär. Olar meýdançadaky 12-nji oýunçy diýsek ýalňyşmarys. Uzyn boýly oýunçylary bolan «Alaýyň» topy kelle bilen oýnamagy halaýandygyny bilýärdik. Biziň wezipämiz garşylyklaýyn hüjüm etmekdi. Ol käbir pursatlarda netijeli bolsa, beýlekilerde başa barmady. Bir pökgini geçirip bildik we ýeňişli hasaby ahyryna çenli saklamana başardyk. Oýunçylarymyz AFK-nyň Kubogy ugrunda ýaryşyň indiki oýnuna çenli dynç alyp biljekdigini umyt edýärin» diýip, Witaliý Alikperow oýundan soňky metbugat-masalahatynda belledi.

2023/24-nji ýyldaky AFK-nyň Kubogy ugrunda ýaryşyň «playoff» tapgyrynda «Merw» 22-nji awgustda myhmançylykda Täjigistanyň çempionatynyň bürünç baýragynyň eýesi «Hujand» bilen duşuşar. Oýun Hujandyň «Täjigistanyň Garaşsyzlygynyň 20 ýyllygy» stadionynda geçiriler. «Playoff» tapgyrynyň oýnuň ýeňijisi AFK-nyň Kubogy ugrunda ýaryşyň deslapky tapgyrynda bolşy ýaly, bir oýunda kesgitlener.

«Hujanddan» üstün çykan halatynda, «Merwiň» oýunçylary «Altyn asyr» (Türkmenistan), «Rawşan» (Täjigistan) we «Abdyş-Ata» (Gyrgyzystan) toparlary bilen bilelikde Merkezi sebitde ýaryşyň toparlaýyn tapgyrynda oýnamaga hukuk gazanarlar.

Merkezi sebitde geçiriljek 2023/24 AFK-nyň Kubogy ugrunda toparlaýyn tapgyryň oýunlary 20-nji sentýabrda başlap, 14-nji dekabrda tamamlanar. Diňe toparyň ýeňijisi ýaryşyň indiki tapgyryna çykar.

Çeşme: turkmenistan.gov.tm («AA»-nyň habarçysy)

AFK-nyň Kubogy 2023/24. Saýlama tapgyry

«Merw» (Türkmenistan) ― «Alaý» (Gyrgyzystan) ― 1:0.

[1-0] 13' Musa Nurnazarow

Geçirilen ýeri: «Sport toplumy», Mary şäheri. 10000 tomaşaçy.

“Merw” futbol klubynyň başlangyç düzümi

[30] - Merdan Saparow (D/K)

[2] - Şazada Bäşimow

[4] - Ambýar Mahmudow

[6] - Azat Orazmuhammedow (80' Maksat Atagarryýew)

[12] - Döwlet Döwletmyradow

[8] - Ýagşysähet Döwletgeldiýew (74' Amangeldi Saparow)

[10] - Kemal Annamuhammedow

[11] - Mukam Nazzyýew (80' Şöhrat Owmadow)

[14] - Daýanç Durdyýew

[17] - Musa Nurnazarow (68' Igor Sekow)

[90] - Murat Ýakşiýew (46' Toýly Goçnazarow)

Baş tälimçi: Witaliý Alikperow

Duýduryşlar:

25' Ambýar Mahmudow ("Merw")

90'+4 Dastan Alybekov ("Alaý")

90'+5 Merdan Saparow ("Merw")

Duşuşygyň emini: Ammar Aşkakana (Kuweýt)

Kömekçi eminler: Abbas Goloum / Seýedali M. Seýedali (Kuweýt)

Ätiýaçdaky emin: Alhunfuş Şukri Hussain (Saud Arabystan)

Gözegçi emin: Puruşot Aman Basker (Hindistan)

Duşuşygyň Komissary: Waleed Muhammed Musa (Birleşen Arap Emirlikleri)