TÝL. 15-nji tapgyr: "Ahal" – "Nebitçi" – 4:0

14.05.2024ý.

Türkmenistanyň futbol boýunça milli çempionatynyň Ýokary ligasynyň 15-nji tapgyryň çäginde ýagny, ilkinji gününde «Ahal» topary paýtagtymyzyň «Nusaý» stadionynda «Nebitçini» kabul etdi.

Ýagny, Ýokary liganyň toparlarynyň arasynda geçýän Türkmenistanyň futbol çempionatynyň 15-nji tapgyrynyň açylyşy Aşgabat şäherinde «Ahal» toparynyň Balkanabadyň «Nebitçi» toparyndan üstün çykmagy bilen tamamlandy.

Meýdança eýeleriniň 4:0 hasabynda ýeňiş gazanan bu duşuşygy «Nusaý» stadionynda bolup geçdi.

Geçen ýyl milli birinjilik ugrundaky ýaryşda bürünç medal gazanan «Nebitçi» topary Şöhrat Aýdogdyýewiň gödek hereketi bilen oýundan çykarylmagy sebäpli, eýýäm 4-nji minutda azlykda galdy. Tizara Döwletmyrat Annaýewiň şägirtleri san taýdan agdyklykdan peýdalanyp, hasaby açdy. Pökgini duşuşygyň 23-nji minudynda Akmämmet Metdäýew saldy. Oýunçylar «Ahal» toparynyň peýdasyna 1:0 hasap bilen arakesmä çykdylar.

Duşuşygyň ikinji ýarymynda «Türkmennebitönümleri» Baş müdirliginiň toparynyň artykmaçlygy hasam göze ildi. 59-njy minutda «Ahal» toparynyň kapitany Elman Tagaýew jerime urgusyny amala aşyrmak bilen, netijäni iki esse köpeltdi. Ondan soň bolsa Gurbanmuhammet Esenow 62-nji we 85-nji minutlarda pökgini tora salyp, hasaby gutarnykly etdi.

Bu toparlaryň arasyndaky duşuşygyň ilkinji aýlawy 6-njy aprelde Balkanabatda «Ahal» toparynyň ýeňşi bilen 1:0 hasabynda tamamlanypdy.

Milli birinjilikde dokuzynjy ýeňşini gazanan «Ahal» topary 28 utuk bilen ikinji ýerde ornaşdy. Paýtagtymyzyň «Altyn Asyr» topary ondan 3 utuk yza galýar. «Altyn Asyr» topara 10-njy tapgyrda myhmançylykda Türkmenbaşynyň «Şagadam» topary bilen soňuna çenli oýnalmadyk duşuşykda 3:0 hasabynda tehniki ýeňiş berildi. Şunda «Türkmenaragatnaşyk» agentliginiň topary iki oýny az oýnady.

Indiki tapgyrda «Ahal» topary oýundan azat bolar, «Nebitçi» topary öz meýdançasynda «Aşgabat» toparyny kabul eder.

Ýokary liganyň toparlarynyň arasynda geçýän Türkmenistanyň futbol çempionatynyň 15-nji tapgyry «Energetik» – «Şagadam», «Köpetdag» – «Arkadag» we «Aşgabat» – «Altyn asyr» toparlarynyň arasyndaky duşuşyklar bilen tamamlanar.

TÝL. 15-nji tapgyryň duşuşygy:

14.05.2024ý. (sişenbe)

“Ahal” – “Nebitçi” – 4:0 (1:0)

[1:0] – 23' Akmämmet Metdäýew 

[2:0] – 59' (p.) Elman Tagaýew

[3:0] – 62' Gurbanmuhammet Esenow

[4:0] – 85' Gurbanmuhammet Esenow

Duýduryşlar:

29' Bäşim Gurbanberdiýew ("Nebitçi")

59' Elýas Akyýew ("Nebitçi")

72' Ata Geldiýew ("Ahal")

Meýdanda çykarylan: 4' Şöhrat Aýdogdyýew ("Nebitçi")

Başlanan wagty: 17:00

Geçirilen ýeri: “Nusaý” stadiony (Aşgabat ş.)

Duşuşygyň emini: Çarymyrat Gurbanow (Aşgabat ş.) 

Kömekçi eminler: A.Begnazarow (Mary ş.), B.Atdyýew (Tejen ş.)

Ätiýaçdaky emin: B.Haknazarow (Aşgabat ş.)

Gözegçi emin: R.Palwanow (Daşoguz ş.)

Ýurdumyzyň futbol çempionatymyzyň Ýokary ligasynyň 15-nji tapgyrynyň jemleýji oýun gününde – 15-nji maýda duşuşyklaryň üçüsi geçiriler: “Energetik” – “Şagadam”, “Köpetdag” – “Arkadag”, “Aşgabat” – “Altyn Asyr”. Duşuşyklaryň ählisi sagat 17:00-da başlanar.