Garaşylan duşuşyga Mingazow gatnaşdy, Messi gatnaşmady

05.02.2024ý.

Türkmenistanyň futbol boýunça milli ýygyndysynyň ýarymgoragçysy Ruslan Mingazow Gongongyň ýyldyzlarynyň hatarynda düýn «Inter Maýami» futbol topary bilen ýoldaşlyk duşuşygyny geçirdi.

Duşuşyk «Inter Maýaminiň» 4:1 hasabyndaky ýeňşi bilen tamamlandy. Amerikan topary 40-njy minutda Teýloryň goly bilen öňe saýlandy. Gonkong ýyldyzlary 43-nji minutda Anýeriň goly bilen hasaby deňleseler-de bu goluň dowamyny getirip bilmediler. 50-nji minutda Sanderlend, 56-da Kampanýa, 85-de bolsa Seýlor tapawutlanyp, «Inter Maýama» ynamly ýeňşi getirdiler. Ruslan Mingazow duşuşyga esasy düzümde çykyp, oýnuň birinji ýarymyny doly oýnady we oýnuň ikinji ýarymynyň başynda başga oýunçy bilen çalşyryldy. «Inter Maýamide» bolsa Lionel Messi gatnaşjak oýunçylaryň sanawyna girizilmedi. Luis Suares, Serži Buskets we Jordi Alba bolsa ätiýaçda oturdy. Dünýä ýyldyzlaryndan diňe Serji Buskets ikinji ýarymda meýdana girdi. Messiniň oýna girmezligi duşuşygyň guramaçylary bilen Gonkongyň hökümetiň arasynda jedelli ýagdaýlaryň ýüze çykmagyna sebäp boldy. Çünki guramaçy kompaniýa Hökümeti Messiniň oýna girjekdigine ynandyryp, ep-esli mukdarda maddy kömek alypdy. Messiniň oýnamandygy üçin indi Hökümet guramaçylardan 2 million dollar puly yzyna soraýar.

Duşuşygyň ahyrynda Türkmenistanyň milli ýygyndysynyň futbolçysy Lionel Messi bilen söhbetdeş boldy we onuň bilen ýadygärlik surata düşdi. R.Mingazowyň aýtmagyna görä, ol argentinaly meşhur oýunça Türkmenistanda hem Messiniň janköýerleriniň köpdügini, ony gowy görýändiklerini aýtdy we oňa geljekde hem üstünlik arzuw etdi.

Duşuşygyň çäklerinde Ruslan Mingazow dünýä ýyldyzlary bilen surata düşüp, ony özüniň jemgyýetçilik torunda paýlaşdy.

Ruslan Türkmenistanyň at gazanan tälimçisi Wasiliý Karpowdan tälim aldy, ol Aşgabadyň «Köpetdagynyň» we Türkmenistanyň milli ýygyndysynyň öňki tanymal oýunçysy Kamil Mingazowyň ogludyr. 2008-nji ýylda «Aşgabat» toparynyň hatarynda Türkmenistanyň çempiony we Naýbaşy kubogynyň ýeňijisi boldy. 2009-njy ýyldan bäri Türkmenistanyň milli ýygyndysyna yzygiderli çagyrylýar.

Ruslan Ýewropanyň birnäçe toparynda oýnady. Riganyň «Skonto» toparynyň düzüminde 2010-njy ýylda Latwiýanyň çempiony, 2012-nji ýylyň Kubogynyň we 2013-nji ýylyň Super kubogynyň eýesi, şeýle hem 2011-nji ýylda Baltika ligasynyň ýeňijisi boldy. 

Ruslan Mingazow, şeýle hem Çehiýanyň çempionatynda «Ýablones», «Slawiýa», «Mlada-Boleslaw», «Prşibram» toparynda oýnan ilkinji türkmen futbolçysydyr. 2016-2017-nji ýyllar möwsüminde Praganyň «Slawiýa» toparynyň hatarynda milli çempionatda altyn medal eýeledi. Çehiýadan soň, Gazagystanyň «Irtyş», «Şahtýor» we «Kaspiý» toparynda oýnady.

2022-nji ýylyň martynda Ruslan Mingazow erkin oýunçy hökmünde «Kitçi» bilen şertnama baglaşyp, Gonkongyň futbol çempionatynda çykyş edýän ilkinji türkmen daşary ýurtly oýunçysy boldy. 2022-2023-nji ýyllar möwsüminde Gonkongyň premýer-ligasynyň iň gowy oýunçysy diýlip ykrar edildi.

Geçen ýyl R.Mingazow «Kitçi» bilen bilelikde Gonkongyň Kubogyny eýeledi, ýurduň çempiony we Gonkong Senýor Shild baýragyny eýeledi. 2023-nji ýylyň başynda «Kitçi» futbol topary Ruslan Mingazow bilen şertnamany 2025-nji ýyla çenli uzaldylýandygyny habar berdi.