Türkmenistan 13 ýyldan soňra Täjigistanyň futbol ýygyndysyny utmaga çalşar
Ozal hem habar berşimiz ýaly, Türkmenistanyň futbol boýunça milli ýygyndysy Merkezi Aziýanyň Futbol assosiasiýasynyň çempionatyndaky ilkinji duşuşygyny şu gün Täjigistanyň ýygyndysy bilen geçirer.
Daşkent şäherindäki «Pahtakor» stadionynda geçiriljek duşuşyk agşam sagat 18:30-da başlanar.
Bu duşuşyk Türkmenistanyň we Täjigistanyň ýygyndylarynyň arasyndaky 9-njy duşuşyk bolar. Iki ýygyndynyň arasynda ozal geçirilen 8 duşuşygyň 2-si ýoldaşlyk duşuşyklarydyr. Şeýle hem iki ýygyndy Merkezi Aziýanyň kubogynda bir, sebitleýin halkara ýaryşda hem bir, dünýä çempionatynyň saýlama tapgyrlarynda 2, AFK-nyň Çagyryş kubogynda 2 gezek duşuşdylar.
Taryhdaky ilkinji Türkmenistan ― Täjigistan duşuşygy 1992-nji ýylyň 11-nji iýulynda geçirildi. Aşgabatdaky «Köpetdag» stadionynda Merkezi Aziýanyň Kubogynyň çäginde geçirilen şol duşuşyk 3:3 hasabyndaky deňlik bilen tamamlandy. Taryhdaky ilkinji Türkmenistan ― Täjigistan duşuşygynda türkmen ýygyndysynyň gollaryny 3-nji minutda Gurbanmämmet Meredow 78-nji minutda Alekseý Kozlow, 83-nji minutda Röwşen Muhadow geçirdi.
Döredilen ilkinji ýyllarynda juda güýçli oýny orta goýan türkmen ýygyndysy 1993-nji ýylyň 2-nji iýunyndaky ýoldaşlyk duşuşygynda täjik ýygyndysy Aşgabat şäherinde 6:0 hasabynda ýeňdi. Çaryýar Muhadowyň iki gezek tapawutlanan (40-njy we 88-nji minutlarda) şol duşuşygynda türkmen ýygyndysynyň beýleki gollaryny 34-nji minutda Kamil Mingazow, 42-nji minutda Berdimyrat Nurmyradow, 78-nji minutda Gurbanmämmet Meredow, 81-nji minutda Amanmyrat Meredow geçirdi.
Ildeşlerimiz 1994-nji ýylyň aprel aýynda Özbegistanyň Daşkent şäherinde geçirilen halkara ýaryşda hem Täjigistanyň ýygyndysyndan 2:0 hasabynda rüstem geldiler. Gollary 21-nji minutda Kamil Mingazow, 90njy minutda bolsa Çaryýar Muhadow geçirdi.
Türkmenistanyň futbol boýunça milli ýygyndysy Täjigistanyň ýygyndysyndan taryhynda ilkinji gezek 1997-nji ýylyň 25-nji maýynda Dünýä kubogy ― 1998-iň saýlama tapgyrynda ýeňildi. Duşuşyk 2:1 hasabynda täjik ýygyndysynyň peýdasyna tamamlandy. 21-nji minutda türkmen ýygyndysy Georgiý Tkawadzeniň dürs ýerine ýetiren 11 metrlik jerime urgusy bilen öňe saýlanan hem bolsalar, bu üstünligi diňe 41-nji minuda çenli gorap bildiler. Şol minutda we soňra 49-njy minutda Wýaçeslaw Knýazew iki gezek tapawutlanyp, täjik ýygyndysynyň taryhynda ilkinji gezek türkmenistanly futbolçylary utmagyna sebäp boldy.
Şondan bir aýa hem ýeter-ýetmez wagt soňra, has takygy, ýene şol ýylyň 22-nji iýunynda täjik ýygyndysy öz meýdanynda türkmen futbolçylaryny 5:0 hasabynda ýeňdi.
Şondan soň iki ýygyndy biri-biri bilen 11 ýyllap duşuşyk geçirmedi. Diňe 2008-nji ýylyň 30-njy iýulynda AFK-nyň Çagyryş kubogynyň çäginde Hindistanyň Haýdarabat şäherinde geçirilen duşuşyk 0:0 hasabyndaky deňlik bilen tamamlandy. Iki ýygyndynyň 2010-njy ýylyň 24-nji fewralynda AFK-nyň Çagyryş kubogynyň çägindäki duşuşygy türkmenistanly futbolçylaryň 2:0 hasabyndaky ýeňşi bilen tamamlandy. Bu gezek ýyldyzy ýaňy şol ýyllarda parlap başlan Arslanmyrat Amanow (33-nji minut) bilen Didargylyç Urazow (42-nji minut) tapawutlandy.
Ýygyndylaryň arasyndaky iň soňky duşuşyk 2016-njy ýylyň 9-njy noýabrynda geçirildi. Bu ýoldaşlyk duşuşygynda täjigistanly futbolçylar 3:0 hasabynda ýeňiş gazandylar.
Şeýlelikde, Täjigistan bilen geçiren 8 duşuşygynda 3 gezek ýeňip, 3 gezek hem ýeňlen, 2 duşuşygyny bolsa deňlikde geçiren türkmen ýygyndysy 9-njy duşuşygynda 4-nji ýeňşi üçin göreşer. Başgaça aýtsak, Mergen Orazowyň şägirtleri 13 ýyllyk arakesmeden soňra Täjigistanyň futbol boýunça milli ýygyndysyny ýeňmäge synanyşarlar.
Türkmenistandan bu duşuşyga Täjigistanyň «Futbol HD» we Özbegistanyň «Sport TV» teleýaýlymlary arkaly tomaşa edip boljakdygyny ýatladýarys.
