«Kuwwatly beden» Özbegistanda geçirilen halkara ýaryşda üstünlikli çykyş etdi

16.08.2023ý.

Aşgabadyň «Kuwwatly beden» çagalar futbol topary Özbegistanyň Buhara şäherinde geçirilen halkara ýaryşa gatnaşdy. Bu ýaryşa «Kuwwatly beden» 2012-nji, 2014-nji we 2015-2016-njy ýyllarda doglan çagalar toparlary bilen wekilçilik etdi.

2012-nji ýylda doglan çagalaryň arasyndaky ýaryşda «Kuwwatly bedeniň» iki topary çykyş etdi. «Kuwwatly beden-A» «A» toparçada ýaryşan bolsa, «Kuwwatly beden-B» «D» toparçada güýç synanyşdy.

«Kuwwatly beden-A» «DÝFŞ-28» toparyny 6:0, «Nawbahory» bolsa 7:0 hasabynda ýeňip, toparçada birinji orny eýeledi. «Dustlik» topary bilen 1:1 hasabynda deňme-deň oýnan «Kuwwatly beden-B» «Ahmadhon» toparyndan 1:2 hasabynda asgyn gelip, «D» toparçada ikinji orna mynasyp boldy.

Halkara ýaryşda «Kuwwatly bedeniň» 2014-nji ýylda doglan çagalary hem üstünlikli çykyş etdiler. «A» toparçada Buhara şäheriniň «Bunýodkor Kids» toparyny 6:2, «Dustlik» toparyny 7:0 hasabynda ýeňen türkmenistanly çagalar «Bunýodkor» bilen 2:2 hasabynda deňme-deň oýnap, toparçada birinji orny eýelediler.

2015-2016-njy ýyllarda doglan çagalaryň arasynda jemi 12 toparyň gatnaşmagynda geçirilen ýaryşda «Kuwwatly beden» «C» toparça wekilçilik etdi. Bu toparçada «Star», «Nasaf-B» we «Junior» toparlary hem ýaryşdy.

Ýaryşda «Kuwwatly bedeniň» iň körpe topary «Stary» 1:0, «Nasaf-B-ni» 7:1 hasabynda ýeňip, diňe «Juniordan» 2:4 hasabynda ýeňlip, dört toparyň arasynda ikinji orny eýeledi.

Şeýlelikde, goňşy döwletde ýokary netijeleri gazanan «Kuwwatly beden» Watanymyza uly üstünlikler bilen dolandy. «Janköýer» toparyň zehinli çagalaryna sport äleminde geljekde hem üstünlikleri arzuw edýär.